Avqustun 31-i Naxçıvan şəhərində kikboks üzrə “Levent Bulut Fight Night – Nakhchivan” turniri keçiriləcək. Naxçıvan Muxtar Respublikası Gənclər və İdman Nazirliyi, Azərbaycan Kikboksinq Federasiyası və “Ləvənt Bulut – Naxçıvan” döyüş klubunun birgə təşkilatçılığı ilə reallaşacaq yarışda 100-dən çox idmançı qələbə uğrunda mübarizə aparacaq.

Nazirliyin mətbuat xidmətindən “İki sahil”ə bildirilib ki, avqustun 30-u yarışın keçiriləcəyi İlham Əliyev adına Olimpiya İdman Kompleksində idmançıların çəki və “Face to face” mərasimi olub.

Qeyd edək ki, yarış səhər saatlarında start götürəcək, rəsmi açılış mərasimi isə 19:00-a nəzərdə tutulub. Mərasimin ardınca gecənin böyük maraq doğuran döyüşləri keçiriləcək.

Döyüşlərin sonunda mükafat kimi kubok, medal, diplom və kəmər təqdim olunacaq.