Hər il 26 iyun tarixi Azərbaycanda böyük qürur və iftixarla – Silahlı Qüvvələr Günü kimi qeyd olunur. Bu əlamətdar gün Azərbaycan xalqının öz müstəqil ordusuna sahib olmaq istəyinin və bu istiqamətdə atılan qəti addımların təntənəsi kimi dəyərləndirilir. Silahlı Qüvvələr Günü Azərbaycan Respublikası Prezidentinin 1998-ci ildə imzaladığı Fərman əsasında dövlət səviyyəsində qeyd olunmağa başlanmışdır.
Silahlı Qüvvələrimizin əsası 1918-ci ilin 26 iyununda Azərbaycan Xalq Cümhuriyyəti tərəfindən qoyulmuşdur. Həmin gün Cümhuriyyət hökuməti ordu quruculuğu haqqında qərar qəbul etmiş, ilk müntəzəm ordu birləşmələri yaradılmışdır. Cəmi 23 ay mövcud olan AXC, hərbi quruculuq sahəsində mühüm addımlar atmış, ölkənin suverenliyini qorumaq üçün ordusunu formalaşdırmağa başlamışdı. Lakin Sovet işğalı bu prosesi yarımçıq qoydu.
1991-ci ildə Azərbaycanın müstəqilliyi bərpa olunduqdan sonra ordu quruculuğu yenidən gündəmə gəldi. 1993-cü ildə xalqın təkidli tələbi ilə hakimiyyətə qayıdan Ümummilli Lider Heydər Əliyev ordu quruculuğunu prioritet məsələ kimi irəli sürdü. Onun uzaqgörən siyasəti və qətiyyəti sayəsində Azərbaycanın Silahlı Qüvvələri formalaşdı və güclənməyə başladı.
Bu gün Azərbaycan Silahlı Qüvvələri regionun ən güclü və peşəkar ordularından biri sayılır. Ordumuzun şəxsi heyəti yüksək döyüş hazırlığına, müasir texnologiyalara və əzmli ruh yüksəkliyinə malikdir. Hərbi islahatlar, beynəlxalq əməkdaşlıq, silahlanmanın yenilənməsi və peşəkar kadrların hazırlanması bu sahədə əldə olunan əsas uğurlardandır.
Prezident İlham Əliyevin rəhbərliyi ilə son 20 ildə orduya diqqət və dövlət qayğısı sistemli şəkildə gücləndirilib. Müdafiə sənayesinin inkişafı, hərbi bazaların yenidən qurulması, hərbçilərin sosial təminatının yaxşılaşdırılması bu siyasətin tərkib hissələridir.
Azərbaycan Ordusunun gücü və qüdrəti ən parlaq şəkildə 2020-ci ilin 27 sentyabr – 10 noyabr tarixlərində baş tutan *Vətən müharibəsi*ndə özünü göstərdi. 44 gün ərzində Azərbaycan Ordusu Ermənistanın 30 ilə yaxın davam edən işğalına son qoyaraq, torpaqlarımızı azad etdi. Bu qələbə yalnız hərbi deyil, milli ruhun, lider-xalq-ordu birliyinin zəfəri idi. Qarabağda tarixi ədalət bərpa olundu.Bu müharibə həm də göstərdi ki, Azərbaycan Ordusu təkcə müdafiə gücünə deyil, hücum qabiliyyətinə, strateji planlama bacarığına və yüksək texnoloji imkanlara da malikdir. Müharibədə istifadə olunan yerli və xarici istehsallı pilotsuz uçuş aparatları, müasir silahlar və koordinasiyalı əməliyyatlar ordumuzun XXI əsrin tələblərinə cavab verdiyini sübut etdi.
Silahlı Qüvvələr Günü yalnız ordunun gücünü nümayiş etdirmək deyil, həm də gənc nəslə vətənpərvərlik ruhunun aşılanması baxımından mühüm əhəmiyyət kəsb edir. Təhsil müəssisələrində keçirilən tədbirlər, hərbi-vətənpərvərlik mövzusunda seminarlar, muzey ziyarətləri və görüşlər gəncləri milli ruhda tərbiyə etməyə xidmət edir.
26 İyun – Silahlı Qüvvələr Günü Azərbaycanın dövlətçiliyinin və müstəqilliyinin qarantı olan orduya verilən dəyərin, xalqın öz əsgərinə olan ehtiramının təzahürüdür. Bu gün biz iftixarla deyə bilərik: güclü orduya malik müstəqil Azərbaycan qalib ölkədir!
Ordumuzun zəfəri xalqımızın birliyinin, iradəsinin və liderinə inamının nəticəsidir. Azərbaycanın Silahlı Qüvvələri bugünkü və gələcək nəsillərin qürur mənbəyi, sülhün və əmin-amanlığın təminatçısıdır.
Yaşasın Azərbaycan Ordusu!
Yaşasın Müstəqil Azərbaycan!
F.Əliyeva,
YAP Xətai rayon təşkilatının üzvü
