Braziliya Prezidenti Luis İnasio Lula da Silva sahibkar Den Yoşpeni bu ilin noyabr ayında Braziliyanın Belən şəhərində keçiriləcək Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 30-cu sessiyasında (COP30) iqlim üzrə yüksəksəviyyəli lider qismində təyin olunduğunu elan edib.

“İki sahil” COP30-un rəsmi səhifəsinə istinadla xəbər verir ki, Den Yoşpe COP30 sədrliyini fəaliyyət gündəliyində dəstəkləyəcək, Paris Sazişinin icrasına yönəlmiş iqlim dəyişikliyi ilə mübarizəyə yönəlmiş tədbirlərin, könüllü öhdəliklərin, təşəbbüslərin və koalisiyaların genişləndirilməsi, həmçinin gücləndirilməsi üçün səylərə rəhbərlik edəcək.

Den Yoşpenin bu vəzifəyə iki il müddətinə təyin edildiyi qeyd olunur. O, 2025-ci ildə COP29 çərçivəsində BMT-nin yüksəksəviyyəli lideri olan Nigar Arpadarai ilə birgə çalışacaq.

“Bakıdan Belənə doğru irəliləyişi sürətləndirdiyimiz bir vaxtda COP30-un yüksəksəviyyəli liderini salamlayacağım günü səbirsizliklə gözləyirəm. Den Yoşpe ilə davamlı və səmərəli tərəfdaşlıq əlaqələri qurmağa, qlobal tərəfdaş şəbəkəmizlə birlikdə çalışaraq, bütün dünya üzrə özəl müəssisələr, şəhərlər və icmalarla iqlim sahəsində iddialı fəaliyyətlərin sürətləndirilməsinə töhfə verməyə ümid edirəm. Ancaq birgə səylərimiz sayəsində hamı üçün daha sağlam, təhlükəsiz və firavan bir gələcəyə nail ola bilərik”, - deyə Nigar Arpadarai bildirib.