Dövlət Turizm Agentliyinin tabeliyində olan qoruqları və muzeylərin 2024-cü ildə ziyarət edənlərin sayında 35 faiz artım olub.
“İki sahil” xəbər verir ki, hazırda Dövlət Turizm Agentliyinin tabeliyindəki “Yanardağ” Dövlət Tarix-Mədəniyyət və Təbiət Qoruğuna və “Atəşgah məbədi” Dövlət Tarix-Memarlıq Qoruğuna giriş ödənişlidir. Eləcə də yerli və xarici ziyarətçilər üçün “Kiş” Tarix-Memarlıq Qoruğunun tərkibindəki Alban Məbədinə, “Yuxarı Baş” Milli Tarix-Memarlıq Qoruğunun tərkibində olan Xan Sarayına, Şəkixanovlar evinə, Şəki Xalq Tətbiqi Sənəti Muzeyinə, Şəki Dövlət Rəsm Qalereyasına, həmçinin “Lahıc” Dövlət Tarix-Mədəniyyət Qoruğunun tərkibində yerləşən Lahıc Tarix-Diyarşünaslıq muzeyinə, “Basqal” Dövlət Tarix-Mədəniyyət Qoruğunun tərkibindəki Hamam muzeyinə və yalnız xarici vətəndaşlar üçün “Diri Baba” türbəsinə biletlə daxil olmaq mümkündür.
Qeyd olunan qoruq və muzeyləri 2024-cü ildə bilet alaraq ziyarət edənlərin sayı 35 faiz artaraq 663 459 nəfər (460 331 nəfəri xarici vətəndaş, 203 128 nəfər Azərbaycan vətəndaşı) təşkil edib. Əvvəlki illərdən fərqli olaraq 2024-cü ildə ziyarətçilərin təxminən 70 faizini əcnəbilər təşkil edib və bununla da 2023-cü illə müqayisədə xarici turistlərin sayında 48 faiz artım müşahidə olunub.
Qeyd edək ki, məktəblilər, əlillər və müharibə veteranları, şəhid ailələri və 12 yaşınadək xarici turistlər qeyd edilən kompleks, qoruq və muzeylərə ödənişsiz giriş haqqına sahibdirlər. 2024-cü il ərzində ödənişsiz giriş haqqı olan 107 213 nəfər müvafiq kompleks, qoruq və muzeyləri ziyarət edib.
Ümumilikdə 2024-cü ildə bilet satışından əldə olunan 5 786 259 manat vəsaitin 866 205 manatı ƏDV olaraq dövlət büdcəsinə ödənilib. Bununla da 2023-cü ilə nisbətən əldə edilən gəlirlərin məbləğində 72 faizdən çox artım qeydə alınıb.
Eləcə də 13 iyun 2024-cü il tarixindən yerli və xarici turistlərin istifadəsinə verilən Palçıq Vulkanları Turizm Kompleksini ziyarət edən 22 352 nəfərin 88 faizini əcnəbilər təşkil edib. Kompleks 2024-cü ildə bilet satışından 310 829 manat vəsait əldə edib ki, bundan da 47 414 manatı ƏDV olaraq dövlət büdcəsinə ödənilib.
Qeyd edək ki, DTA-nın tabeliyindəki qoruq və muzeylərə giriş qiymətləri yerli vətəndaşlar üçün 2 manat (Palçıq Vulkanları Turizm Kompleksində 5 manat), tələbələr üçün 1 manat (Palçıq Vulkanları Turizm Kompleksində 3 manat) təşkil edir. Xarici vətəndaşlar üçün qiymət 5-15 manat arasında dəyişir.
Ziyarətçilərin rahatlığının və bilet satışının effektivliyinin təmin edilməsi üçün biletlərin satışı kompleks, qoruq və muzeylərdə olan müvafiq kassalarla yanaşı, iticket.az onlayn platforması üzərindən də həyata keçirilir.
