Bir gün əvvəl İsrail hərbi-siyasi kabinetinin Həmasla barışıq razılaşmasını təsdiqləməsi fonunda Qəzza bölgəsində atəşkəs rejiminin qüvvəyə minəcəyi tarix məlum olub.

“İki sahil” xəbər verir ki, bu haqda BBC məlumat yayıb.

Tərəflər arasında dialoqa vasitəçilik edən Qətərin xarici işlər nazirliyinin sözçüsü Məcid Əl Ənsari İsrail və Həmas arasında atəşkəsin rejiminin yanvarın 19-u yerli vaxtla 08.30-da işə düşəcəyini elan edib.

Qeyd edək ki, razılaşmaya əsasən, danışıqlarda tərəflər, eyni zamanda, Qəzzadakı əsirlərin mərhələli şəkildə azad edilməsi barədə ortaq məxrəcə gəliblər.

Xatırladaq ki, çərşənbə günü Dohada keçirilən danışıqlarda İsrail və HƏMAS atəşkəs rejimi və əsirlərin azad edilməsi ilə bağlı saziş bağlayıblar. Saziş üç mərhələdən ibarətdir və ilkin mərhələdə atəşkəslə yanaşı, əsir mübadiləsinin aparılması nəzərdə tutulur; HƏMAS Qəzzada saxladığı 33 İsrailli əsiri azad etməyi öhdəsinə götürüb, İsrail tərəfi isə həbsxanalarda olan bir neçə fələstinli məhbusu sərbəst buraxmağa söz verib.