Gürcüstanda prezident seçkiləri başa çatıb.  Mərkəzi Seçki Komissiyasının məlumatına görə, "Gürcü Arzusu - Demokratik Gürcüstan" partiyasından olan keçmiş parlament üzvü, sabiq futbolçu Mixeil Kavelaşvili Gürcüstanın Prezident seçilib. Bununla da Mixail Kavelaşvili  Gürcüstanın altıncı prezidenti kimi adını tarixə yazdırıb. Qeyd edək ki, ölkə tarixində ilk dəfə prezident ümumxalq səsverməsi ilə deyil, 300 nəfərdən ibarət xüsusi kollegiya vasitəsilə müəyyə edilib.  Prezident İlham Əliyev Gürcüstanın Prezidenti vəzifəsinə seçilməsi münasibətilə Mixeil Kavelaşviliyə təbrik məktubu ünvanlayıb. Dövlətimizin başçısı məktubunda Azərbaycan-Gürcüstan əlaqələrinin tarixən dostluq və mehriban qonşuluq şəraitində yaşamış, bir-birinə daim dəstək olmuş xalqlarımızın iradəsindən qaynaqlandığını bildirib. 

Gürcüstan və Azərbaycan iki müstəqil dövlət kimi daim bir-birinin yanındadır

Qeyd edək ki, Gürcüstan ölkəmizin  müstəqilliyini ilk tanıyan dövlətlərdən biridir. Prezident Heydər Əliyevin 1996-cı ildə Tbilisiyə, 1997-ci ildə Prezident Eduard Şevardnadzenin Bakıya səfəri çərçivəsində imzalanan sənədər iki qardaş ölkə arasındakı münasibətlərə yeni çalarlar əlavə edib. Gürcüstan ölkəmizdə Heydər Əliyevin rəhbərliyi ilə hə¬yata keçirilən neft strategiyasına, eləcə də digər regional layihələrə (Bakı-Tbilisi-Ceyhan neft boru kəməri, Bakı-Tbilisi-Ərzurum qaz boru kəməri, Bakı-Tbilisi-Qars dəmir yolu və s.) də öz töhfəsini verib. Yeri gəlmişkən, bu layihələr təkcə Azərbaycan və Gürcüstan üçün deyil, bütün region, eləcə də Avropa və Asiya üçün mühüm əhəmiyyət kəsb edir. Bu ilin mart ayında Prezident İlham Əliyev Gürcüstanın Baş naziri İrakli Kobaxidze ilə birgə mətbuata verdiyi bəyanatında bu kimi məsələlərə toxunmuş, həmçinin iki ölkənin yeni layihələr, o cümlədən yaşıl enerji layihəsi üzərində işlədiyini bildirmiş və əlavə etmişdi ki, Gürcüstan və Azərbaycan iki müstəqil dövlət kimi daim bir-birinin yanındadır və iki etibarlı tərəfdaş kimi çıxış edir: ”Biz bütün dövrlərdə bir-birimizin suverenliyini, ərazi bütövlüyünü, sərhədlərin toxunulmazlığını dəstəkləyən açıqlamalar vermişik, müvafiq beynəlxalq təşkilatlarda səsvermə zamanı bir-birimizi dəstəkləmişik, bundan sonra da bu dəstək davam edəcək”.

Bu gün Gürcüstan-Azərbaycan arasında əlaqələrin strateji tərəfdaşlıq səviyyəsinə yüksəlməsi  bunu bir daha sübut edir. Təbrik məktubunda bir daha bu məsələrə toxunan dövlətimizin başçısı,  həmçinin bildirib: “Belə möhkəm təməllər üzərində qurulmuş, qarşılıqlı hörmət və etimada əsaslanan ikitərəfli münasibətlərimizin bu gün hərtərəfli və müvəffəqiyyətlə inkişaf etməsi bizi sevindirir. İnanıram ki, ölkələrimizin və xalqlarımızın rifahı, regionumuzun sabitliyi və təhlükəsizliyinin təmin olunması, iqtisadi potensialının reallaşdırılması naminə dövlətlərarası əlaqələrimizin və strateji tərəfdaşlığımızın daha da möhkəmləndirilməsi və genişləndirilməsi istiqamətində birgə səylər göstərəcəyik”.

Qərb Gürcüstanda öz çirkin niyyətini həyata keçirə bilmir

Qeyd edək ki, Mixail Kavelaşvili Gürcüstan prezidenti vəzifəsinə yeganə namizəd idi. Onun namizədliyi hakim "Gürcü Arzusu - Demokratik Gürcüstan" partiyası tərəfindən irəli sürülmüşdü. M.Kavelaşvilinin andiçmə mərasimi dekabrın 29-da keçiriləcək.  Bir məsələni də vurğulayaq. Artıq yarım aya yaxındır ki, "Gürcü Arzusu-Demokratik Gürcüstan” Partiyasının 2028-ci ilin sonuna qədər Aİ-yə üzvlük danışıqlarını dayandırmaq qərarını, həmçinin Ukraynadakı müharibə ilə əlaqədar Rusiyaya qarşı sanksiyalara qoşulmaqdan imtina etməsini bəhanə edən Qərb Gürcüstandakı əlaltılarından istifadə etməklə iğtişaşlar, aksiyalar törətməkdədir. Bununla da müstəqil siyasət yürüdən bu ölkəni “rəngli inqilab”a sürükləməyə, onu Ukraynanın gününə salmağa çalışmaqdadır. Bununla da Qərb vəziyyəti gərginləşdirməklə bölgədə qeyri-sabitlik riskini artırır. Amma gürcü xalqının əzmkarlığı sayəsində Qərb öz çirkin niyyətini həyata keçirə bilmir. Nə qədər qəribə olsa da bu prosesin önündə gedənlərin sırasında Gürcüstanın Prezidenti Salome Zurabişvili  də var. Yeri gəlmişkən qeyd edək ki, Gürcüstanın baş naziri İrakli Kobaxidze Salome Zurabişvilinin onu son üç ildə ölkənin  milli maraqlarına zərər vurmağa çalışdığını dəfələrlə bəyan edib. Hətta Salome Zurabişvili utanıb-qızarmadan "yeni seçki formatının demokratik prinsiplərə uyğun olmadığını" bildirib. Qeyd edək ki, Gürcüstan Prezidenti Salome Zurabişvili parlamenti və prezident seçkisini legitim hesab etmədiyi üçün səlahiyyət müddətinin davam edəcəyini bəyan edib.

Qvami Məhəbbətoğlu, “İki sahil”