Hindistanda müqəddəs sayılan və paytaxt Yeni Dehlidən keçən Yamuna çayı insanların sağlamlığı üçün təhlükə yarada biləcək qalın ağ köpük təbəqəsi ilə örtülüb.

“İki sahil” xəbər verir ki, bu barədə “Press Trust of India” (PTI) agentliyi ekspertlərə istinadən məlumat yayıb.

Hindistan paytaxtında hakim olan Sadə İnsan Partiyası açıqlayıb ki, şəhər rəhbərliyi vəziyyəti diqqətlə izləyir.

“Bu problemi həll etmək üçün artıq xüsusi köpük söndürücülər səpilməyə başlanılıb və meqapolis hökuməti vəziyyəti idarə etmək və həll etmək üçün fəal tədbirlər görür”, – PTI partiya nümayəndəsinin bəyanatını sitat gətirir.

Ətraf mühitin mühafizəsi üzrə ekspertlərin sözlərinə görə, aşındırıcı köpük yüksək miqdarda ammonyak və fosfatlar ehtiva edir ki, bu da tənəffüs və dəri problemləri də daxil olmaqla sağlamlıq üçün ciddi təhlükə yaradır.

Qeyd edək ki, Qanqın ən böyük qollarından biri olan Yamuna çayının Dehli Milli Paytaxt Ərazisi rayonundakı hissəsi həmişə yüksək çirklənmə səviyyəsi ilə fərqlənir, burada, demək olar, balıq yaşamır və onun sularında köpüyün əmələ gəlməsi tez-tez baş verir. Yerli KİV-in məlumatına görə, şəhər sakinləri paytaxt iqtidarını fəaliyyətsizlikdə və ətraf mühitin çirklənməsi ilə mübarizədə yetərincə səy göstərməməkdə daim ittiham edirlər.