İtaliyanın Baş naziri Ciorcia Meloni ölkəsinin BMT-nin Livandakı sülhməramlı missiyasında (UNIFIL) iştirak edən İtaliya hərbi kontingentinin sayını artırmağa hazır olduğunu deyib.

“İki sahil” xəbər verir ki, Ciorcia Meloni Yaxın Şərqdə gərginliyin azaldılmasının və UNIFIL personalının təhlükəsizliyinin təmin edilməsinin zəruriliyini bildirib. O, sülhməramlı missiyaya qarşı hücumların qəbuledilməz olduğunu deyib, UNIFIL-in silahlı qüvvələrinin potensialının gücləndirilməsi üçün addımların atılmasının vacibliyini qeyd edib.

Baş nazir Livandan didərgin düşmüş insanlarla bağlı vəziyyətində narahatlığını ifadə edib, İtaliyanın bu yaxınlarda ayırdığı əlavə 17 milyon avroluq humanitar yardımın əhəmiyyətini vurğulayıb.

Qeyd edək ki, İtaliyanın UNIFIL-də mindən çox hərbçisi var.