Azərbaycan-Gürcüstan dostluğunun çox qədim tarixi var və bu iki ölkə təkcə qonşu və dost deyil, həm də mühüm strateji tərəfdaşdır. Azərbaycan-Gürcüstan əlaqələri ötən illər ərzində dinamik inkişaf edib. Ölkələrimiz arasında siyasi, iqtisadi, enerji, mədəni və digər sahələrdə səmərəli əməkdaşlıq formalaşıb. Ulu Öndər Heydər Əliyevin və Eduard Şevardnadzenin dostluq münasibətləri bu əlaqələri inkişaf etdirməyə əhəmiyyətli təkan verib.
Azərbaycan ilə Gürcüstanın tarixi İpək Yolu üzərində yerləşməsi və ölkələrimiz tərəfindən birgə irimiqyaslı enerji və nəqliyyat layihələrinin icra edilməsi regionumuzdan keçən yük axınının həcmini dəfələrlə artırıb. Azərbaycan və Gürcüstan arasında uğurlu regional əməkdaşlıq münasibətləri çərçivəsində irimiqyaslı qlobal enerji və nəqliyyat-kommunikasiya layihələrinin Bakı-Tbilisi-Ceyhan neft boru kəməri, Bakı-Tbilisi-Ərzurum qaz boru kəməri, Bakı-Tbilisi-Qars dəmir yolu və s. reallaşdırılması bölgədə sülhə və sabitliyə xidmət edir. Bununla paralel olaraq, GUAM, Qara Dəniz İqtisadi Əməkdaşlıq Təşkilatı və digər qurumlar daxilində əməkdaşlıq ikitərəfli strateji əlaqələri daha da möhkəmləndirib.
Azərbaycanın öz enerji resurslarının Avropa bazarlarına çatdırılmasında, eyni zamanda, Şərqdən Qərbə gedən yüklərin daşınmasında Gürcüstan mühüm tranzit rol oynayır.
Gürcüstanın Baş naziri İrakli Kobaxidzenin cari ilin 16 mart tarixində Azərbaycana rəsmi səfəri ölkələrimiz və xalqlarımız arasındakı dostluq və qardaşlıq münasibətlərinin daha da inkişafına yeni təkan verəcək.
Azərbaycan, Gürcüstan və Türkiyə Cənub Qaz Dəhlizi layihəsinin təşəbbüskarları olaraq, onun reallaşdırılmasında da xüsusi rola malikdirlər. Bu barədə mətbuata bəyanatla etdiyi çıxışında öz fikirlərini bildirən cənab Prezident İlham Əliyev vurğuladı ki, bu gün Azərbaycan qazını alan ölkələrin sayı artıq 8-ə çatıb və bu, əlbəttə ki, son deyil. Yaxın gələcəkdə bu ölkələrin sayı artacaq. Çünki Azərbaycanın enerji resurslarına olan tələbat ildən-ilə artır. Müasir dünyada gedən geosiyasi proseslər isə, yaxın gələcəkdə bu tendensiyanın davam edəcəyini deməyə bütün əsasları verir.
Strateji tərəfdaş olan Azərbaycan və Gürcüstanın birgə həyata keçirdiyi infrastruktur layihələri - nəqliyyat, enerji layihələri bir çox ölkələr üçün böyük əhəmiyyət kəsb edir və bundan sonra da bu istiqamətdə əlavə addımlar atılacaq. Öz çıxışında bu məsələyə xüsusi toxunan cənab Prezident İlham Əliyev bildirdi ki, Bakı-Tbilisi-Qars dəmir yolunun bir-iki aydan sonra artıq genişləndirilmiş formada fəaliyyətə başlaması böyük nailiyyətlərdən biridir. Yeni formatda dəmir yolunun ötürmə qabiliyyəti 1 milyon tondan 5 milyon tona çatdırılacaq və eyni zamanda, bu dəmir yolunun fəaliyyəti bir çox ölkələr üçün də cəlbedici olacaq.
Bu gün Gürcüstanın və Azərbaycanın birgə icra etdiyi layihələr təkcə Cənubi Qafqaz regionu üçün deyil, eyni zamanda Avrasiya üçün böyük məna kəsb edir.
Cavid Mehdizadə,
YAP Xətai rayon təşkilatının fəalı
