Vətən, millət yolunda canından keçərək, şərəfli şəhidlik zirvəsinə ucalan qəhrəman oğlanlardan biri də Ceyhun Sabir oğlu Yaqubovdur. Birinci Qarabağ müharibəsinin iştirakçısı, sıravi əsgər Ceyhun Yaqubov 1974-cü ildə Masallı rayonun Köçəkli kəndində dünyaya göz açıb. Ömür yolu cəmi 20 il olan bu, Vətən sevdalısı yazdığı şərəfli tarixlə özünə əbədi bir abidə ucaldıb. Odur ki, cismən aramızda olmasa da, hər dəfə adı çəkiləndə bütün Azərbaycan xalqı qürur duyur. Masallıda milyonların ürəyinə köçən igid Vətən oğlunun adını özündə yaşadan yadigarlar indi çoxdur. Dövlətimiz şəhidin ailəsini də heç vaxt unutmur. Ailənin qayğı və problemlərini vaxtında öyrənir, onlara hər işdə dayaq dururlar. Bu günlərdə isə Ceyhun Yaqubovun ailəsi üçün tikilən birmərtəbəli, 3 otaqlı fərdi yaşayış evi istifadəyə verildi.
Masallı Rayon İcra Hakimiyyətinin başçısı Araz Əhmədovun, Həsəni kənd ərazi nümayəndəsinin və bələdiyyəsinin, kənd sakinlərin, eləcə media nümayəndələrin qatıldığı mərasimdə Müzəffər Ali Baş Komandan cənab İlham Əliyevin rəhbərliyi altında qazanılan 44 günlük əbədi tarixi şanlı qələbədən, qəhrəman Vətən övladlarının misilsiz hünərindən danışan rayon rəhbəri onu da bildirdi ki, dövlət başçısı və Birinci vitse-prezident Mehriban xanım Əliyeva tərəfindən hər zaman şəhid ailələrinə, müharibə əlillərinə və onların ailə üzvlərinə xüsusi diqqət və qayğı vardır. Həmçinin şəhid ailəsi üçün tikilən növbəti fərdi yaşayış evinin inşasında zəhməti olan xeyriyyəçilərə razılığını söyləyərək qeyd etdi ki, biz şəhidlərə, onların ailələrinə, hərbiçilərə, müharibə veteranlara həmişə, hər zaman minnətdar olmalıyıq. Şəhidlər ömürlərini Vətən torpağının azadlığına qurban verməklə bizə şərəfimizi qaytarıblar. Bu, ölməz qəhrəmanlar xalqımız durduqca ehtiramla xatırlanacaq. Biz onlara, şəhidlərin ailə üzvlərinə, övladlarına ömrümüz boyu borcluyuq.
Kənd sakinlərinə söz veriləndə Ə. Xəlilov çıxış etdi:” Biz qalib xalq olaraq başıuca yaşayırıq. Şəhidlərimiz öz qanı bahasına bu sevinci bizə bəxş ediblər. Rayonumuzda şəhid ailələrinə dərin ehtiram və hörmət vardır. Qarabağ müharibəsi şəhidi, Azərbaycan Ordusunun sıravi əsgəri Ceyhun Sabir oğlunun ailəsi üçün tikilən fərdi yaşayış evinin istifadəsi bütün masallıları ürəkdən sevindirir və hər dəfə Ceyhunun adı çəkiləndə burada böyük də, kiçik iftixar hissi keçirdir. Neçə deyərlər, şəhidlər ölməz, Vətən bölünməz!”
Şəhidin ailəsi öz növbəsində onlara göstərilən yüksək diqqət və qayğıya görə Azərbaycan Respublikasının Prezidenti cənab İlham Əliyevə, Birinci vitse-prezident Mehriban xanım Əliyevaya, Masallı rayonunun icra başçısına, evin tikintisində zəhməti olan bütün şəxslərə minnətdarlığını bildirdilər.
Zəfər Orucoğlu,
Azərbaycan Jurnalistlər Birliyini üzvü