İkinci Qarabağ müharibəsindən üç il keçdi. Torpaqlarımızı Ermənistanın işğalından azad etdik. Xankəndidə , Şuşada, Laçında … demək olar ki, sahiblərinə qovuşan bütün ərazilərimizdə dalğalanan bayraqlarımız xalqımıza, fərəh gətirdi, hər birimizi qürurlandırdı. Dostlarımız Qələbəmizə sevindilər, yanımızda oldular. Artıq tarixin arxivinə atılan «Dağlıq Qarabağ münaqişəsi»ni yaradanlardan başqa. Daşnakların əsrlərdən bəri hazırladıqları planlara uyğun həmin münaqişəni yaradan « xarici ağalarına» boyun əyən daxili satqınlarımız da onlara xoş gəlsin, dilənçi paylarını kəsməsinlər deyə başlarına qara bağladılar. Son vaxtlarda daxili problemlərini arxa plana keçirib, Cənubu Qafqazı xarici siyasətlərinin prioritetləri kimi, gündəmdə saxlayan ABŞ-a, Fransaya, səlahiyyətsiz beynəlxalq qeyri-hökumət təşkilatlarına xidmət edən AXCP sədri Əli Kərimlinin, «Milli Şura»nın oyuncaq rəhbəri Cəmil Həsənlinin, qurumun Koalisiya Mərkəzinin üzvləri Toftq Yaqublunun, Gültəkin Hacıbəylinin, şər-böhtan ustası Fuad Qəhrəmanlının avropalaşmış, erməniləşmiş pas atan vicdanları dilə gəlmədi. Xankəndidə ucalan üçrəngli bayrağımızın dalğalanması bütün dünyada Azərbaycanın güdrətinin göstəricisi kimi etiraf edilsə də ağalarının itaətində olan milli satqınlarımızın qorxularından Şuşa, Xankəndi tərəfə baxmağa belə iqtidarları çatmadı.
Azərbaycanın 30 il işğal altında qalan torpaqlarının əbədi olaraq Ermənistana verilməsinin tərəfdarı olan ATƏT, Avropa İttifaqı, Fransa, ABŞ artıq gedən qatarın arxasınca baxaraq yenidən fəallaşıblar. Eyni mənbədən idarə olunan anti-Azərbaycan dairələr bütün vasitələrdən istifadə edərək ölkəmizə qarşı birlikdə ideoloji , informasiya hücumuna keçiblər. Cənubi Qafqazda maraqlarını həyata keçirməyə çalışan Fransa, ABŞ hayları yenidən silahlandırırlar. Ermənilərə bütün vasitələrlə dəstək göstərən Birləşmiş Ştatların müxtəlif dövlətlərdə daxili çaxnaşma salmaqla məşğul olan ələbaxan təşkilatları var gücləri ilə Ermənistana yardım edirlər. Anti-Azərbaycan dairələri ölkəmizlə bağlı saxta, böhtan xarakterli məlumatlarla təmin edən qrant ovçuları, milli xəyanətkarlarımızın Zəfərimizin qeyd olunduğu zaman lal olan dilləri o zaman açılır. Belə təxribatlara dəstək göstərən «yurd»çu Əli Kərimli, hay-küyçü Tofiq Yaqublu, milli dəyərlərdən uzaq «alim» Cəmil Həsənli «ura» deyərək səslərini ucaldırlar. Deyək ki, bu əbləhlər qrant xatirinə vicdanlarını sataraq, vətəndaşlıq məsuliyyətlərini unudaraq ermənilərlə, onların havadarları ilə yaxınlıq edirlər. Dinlərini-məzhəblərini belə hərraca qoyanlar Azərbaycana qarşı təxribatlarını intensivləşdirən USAİD, NED, Marşal Fondu, İREX kimi digər təşkilatlara da xidmət göstərirlər. ABŞ-ın maliyyə dəstəyi ilə «demokratiyanın inkişafına dəstək» adı altında fəaliyyət göstərən bu üzdəniraq təşkilatlar kimi, «insanlığı, milli –mənəvi dəyərləri qoruyan» UNECSO da səlahiyyətləri çatmasa belə ABŞ Administrasiyasının, Fransa rəhbərlərinin «düşüncəsi» ilə hərəkət edərək ölkəmizə qarşı genişmiqyaslı təxribatlarını intensivləşdirirlər. Bu sahədə bələdçiləri isə milli xəyanətkarlarımızdır. Xarici donorların əlində oyuncaq olan bu simasızlar müsəlman olduqlarını belə unudublar. Neçə dəfə dəvət edilsə də Azərbaycana gəlməkdən imtina edən, erməni hərbi birləşmələri, vandalları tərəfindən dağıdılan, daşı-daş üstdə qalmayan şəhər və kəndlərimizdə yaranan acınacaqlı vəziyyəti, erməni quldurlarının donuz saxladıqları məscidlərimizi «görmək istəməyən» UNESCO Ermənistanda sinaqoqun yandırılmasını da təbii qəbul etdi. Çünki başqalarının dininə hörmətsizlik edənlər mənfur niyyətli ermənilər idi. Milli –mənəvi dəyərlərimizə təhqir olan bu kimi hallara belə biganə qalan məzhəbsiz xəyanətkarlarımız hələ də ağızlarına su alıb dayanıblar. Onları qınamaq da olmur. Çünki milli mənsubiyyətlərini belə qrantlara dəyişən əlilər, cəmillər, tofiqlər üçün Vətən anlayışı çoxdan unudulub.
Regiona səfəri zamanı Xankəndidən Hayastana könüllü , sərbəst miqrasiya edən ermənilərlə görüşən , «onların halına acıyan» USAID-in direktoru Samanta Puerin 30 ilə yaxın Ermənistanın təcavüzü nəticəsində fundamental hüquqlarından məhrum edilmiş bir milyondan artıq azərbaycanlı qaçqın və məcburi köçkünlərlə görüşdən imtina etməsi belə milli mənsubiyyətlərini unudan Əli Kərimlini, Cəmil Həsənlini, Tofiq Yaqublunu narahat etmədi. Çünki Samantanın görüşdükləri elə onların qan qardaşları idilər.
Amma bu zatı qırıqlar beynəlxalq aləmdə Azərbaycanla bağlı müsbət fikir formalaşdıqda səslərini hamıdan yüksək qaldırırlar. Görünür antimilli satqınlarla mübarizə aparan bəzi dövlətlərın təcrübəsinin ölkəmizdə də tətbiqinin vaxtı çatıb. Artıq bir neçə ölkədə dövlətin maraqlarına xələl gətirən qüvvələrə qarşı qanunların həyata keçirilməsinə başlanılıb. Xarici dairələrə xidmət edən müxalifət partiyalarının dövlət qeydiyyatları ləğv edilir. Müxtəlif ölkələrə və qüvvələrə agentlik edən syasi partiyalar, qeyri-hökumət təşkilatları haqqında qanunvericilik əsasında ciddi, sərt tədbirlər görülür. Azərbaycanın humanizmindən istifadə edən milli xəyanətkarlar xidmət göstərdiklər ermənipərst dövlətlərin bu «təcrübəsindən» ibrət götürməli, xarici bazarlarda hərraca çıxardıqları, onlar üçün mənasını itirdikləri «papaq»larını qarşılarına qoyub düşünməlidirlər.
Xuraman İsmayılqızı, «İki sahil»