YAP Azərbaycan Respublikasının Konstitusiyası və qanunvericiliyi çərçivəsində, özünün Nizamnaməsi və Proqramı əsasında fəaliyyət göstərən, öz sıralarında Azərbaycanda hüquqi dövlət, sabit və sosialyönümlü iqtisadiyyat, vətəndaş cəmiyyəti qurmaq ideyalarını qəbul edən vətəndaşları birləşdirən sağ mərkəzyönümlü siyasi partiyadır. Müxalifət partiyası kimi yaranan YAP 1993-cü ildə partiyanın Sədri Heydər Əliyevin prezident seçilməsi, 1995-ci ildə keçirilən parlament seçkilərində qalib gəlməklə Azərbaycanda iqtidar partiyasına çevrildi.
Yeni Azərbaycan Partiyası yarandıqdan bu günə qədər çox böyük, şərəfli və uğurlu yol keçib: YAP “31 il keçilən keşməkeşli və şərəfli yolun təqdimatıdır. Partiya bütün sınaqlardan şərəflə çıxdı, ilk gündən xalqın partiyası kimi nüfuz qazandı. Buna əsas verən təbii ki, tutduğu yola, əqidəyə sadiqliyi, hər zaman dövlətə, xalqa xidməti fəaliyyətinin əsas prinsipi kimi qəbul etməsidir. YAP müxalifət partiyası kimi yaransa da heç vaxt dövlətə, dövlətçiliyə müxalifətdə olmadı. Daim Azərbaycanın daha güclü, qüdrətli olmasına, xalqımızın yüksək rifah şəraitində yaşamasına səy göstərdi.”
Həm Azərbaycan dövlətinə, həm də YAP-a ləyaqətlə rəhbərlik etməsilə Ulu Öndər Heydər Əliyev partiyanın nüfuzunu yüksəltmişdir. Bu partiya 1993, 1998, 2003, 2008, 2013 və 2018-ci illərdə baş tutan Prezident seçkilərində qalib gəlib. 1993 və 1998-ci illərdə Heydər Əliyev, 2003, 2008, 2013 və 2018-ci illərdə isə İlham Əliyev xalqın böyük dəstəyi ilə Azərbaycan Prezidenti seçiliblər. 1995, 2000, 2005, 2010, 2015 və 2020-ci illərdə keçirilən Parlament seçkilərində də Yeni Azərbaycan Partiyası qalib gəlib. 125 üzvdən ibarət olan Milli Məclisdə YAP 1995-ci ildə 53 nəfərlə, 2000-ci ildə 77 nəfərlə, 2005-ci ildə 63 nəfərlə, 2010-cu ildə 71 nəfərlə, 2015-ci ildə 74 nəfərlə, 2020-ci ildə isə 70 nəfərlə təmsil olunub.
Beləliklə, müstəqil Azərbaycanın tarixində öz üzərinə böyük tarixi missiya götürən YAP yaradıldı. Ulu Öndər Heydər Əliyev rəhbərlik etdiyi Yeni Azərbaycan Partiyasını qısa müddət ərzində cəmiyyətin aparıcı qüvvəsinə çevirməyi bacardı. Güclü lideri, mükəmməl proqramı, təkmil siyasi platforması, xalqın marağı naminə qətiyyət və prinsipiallığı sayəsində, digər tərəfdən azərbaycançılıq və dövlətçilik mövqeyində durduğu üçün öz sıralarında yüz minlərlə üzvü birləşdirən YAP əsl ümumxalq partiyasına çevrildi. Öz məramında və praktik fəaliyyətində demokratik prinsiplərə, ümumbəşəri dəyərlərlə milli xüsusiyyətlərin vəhdətinə, hüquqi dövlət, vətəndaş cəmiyyətinə, sərbəst iqtisadiyyat yaradılmasına üstünlük verdi, güclü sosial müdafiə proqramı ilə fəaliyyət göstərməyə başladı.
Ulu Öndər cəmiyyətimizin aparıcı siyasi qüvvəsi olan bu partiyanı qısa zaman kəsiyində inkişaf etdirdi, özünün dediyi kimi dünənin, bugünün və sabahın partiyası səviyyəsinə yüksəltdi. Bu dahi insanın yaratdığı və bizlərə miras qoyduğu bu partiya ötən illər ərzində ölkəmizdə siyasi sabitliyin və davamlı inkişafın təminatçısı kimi çıxış etmişdir. Heydər Əliyev ideyalarına daima sadiq olan partiya milli məfkurənin əsasını təşkil edən dövlətçilik, qanunçuluq, azərbaycançılıq, yaradıcı təkamül, vətəndaş həmrəyliyi və sosial ədalət prinsiplərini özünün həyat tərzinə çevirmişdir.
Bəli, bu gün də Heydər Əliyev yolu müstəqillik, Azərbaycançılıq, dövlətçilik, demokratiklik, qanunun aliliyi və bəşərilik deməkdir. Məhz bü çağdaş tendensiyaları və regionda yaranmış “yeni reallığı” nəzərə alan yeni Proqram YAP İdarə Heyətinin 2021-ci il 29 dekabr iclasında təsdiq edilmişdir. Prezident İlham Əliyevin təbirincə desək YAP Cənubi Qafqazın ən böyük və ən nüfuzlu partiyasıdır.
Həqiqətən də bu, belədir. Məhz Prezident İlham Əliyevin rəhbərliyi və həyata keçirdiyi düşünülmüş uğurlu siyasət nəticəsində Vətən müharibəsindəki tarixi Qələbəmizlə ərazi bütövlüyümüz və suverenliyimiz bərpa edilmiş, xalqın milli qüruru özünə qaytarılmış, dünyada yeni reallıqlar yaradılmışdır . Xalqımıza Zəfər sevincini yaşatdı Müzəffər Ali Baş Komadan . Uzun illər düşmən tapdağında qalan Vətən torpağı işğaldan azad edildi. Prezident İlham Əliyev isə tarixdə Müzəffər sərkərdə kimi qalmağı bacardı. Bu, qələbə Prezident İlham Əliyevin və xalqımızın qələbəsi oldu. Yeni Azərbaycan Partiyasının qarşısında duran əsas vəzifə bu nailiyyətləri göz bəbəyi kimi qorumaq, ümummilli lider Heydər Əliyev ideyasına sədaqətlə xidmət etməkdir.
Biz gələcəyə çox böyük nikbinliklə və inamla baxırıq. Ümummilli liderimiz, Yeni Azərbaycan Partiyasının banisi Heydər Əliyevin qurduğu, yaratdığı müstəqil Azərbaycan bu əsrdə daha yüksək zirvələrə qalxacaqdır. Buna bizim gücümüz, qətiyyətimiz, potensialımız və bu nəcib məqsədimizi həyata keçirə biləcək Yeni Azərbaycan Partiyası kimi qüdrətli, xalq tərəfindən müdafiə edilən təşkilatımız, ümummilli liderimiz Heydər Əliyevin yolunu uğurla davam və inkişaf etdirən dünya azərbaycanlılarının dahi Sərkərdəsi - cənab İlham Əliyev kimi Prezidentimiz, Müzəffər Ali Baş Komandanımız və partiyamızın Sədri vardır.
Arzu Əliyeva,
YAP Pirallahı rayon təşkilatı Aparatının məsul əməkdaşı
