Martın 2-də Məktəb Lisey Kompleksində Bakı Şəhəri üzrə Təhsil İdarəsinin (BŞTİ) təşkilatçılığı ilə Heydər Əliyevin 100 illik yubileyinə həsr olunmuş Birinci Bakı İdman Festivalı keçirilib.
Festivalda BŞTİ-nin müdiri Mehriban Vəliyeva, Milli Məclis sədrinin müavini, parlamentin Gənclər və idman komitəsinin sədri Adil Əliyev, Milli Məclisin Komitə sədri, Universal Döyüş Federasiyasının vitse-prezidenti Sadiq Qurbanov, millət vəkili, Azərbaycan Karate-do Federasiyaları Assosiasiyasının prezidenti Ülvi Quliyev, Nərimanov Rayon Gənclər və İdman İdarəsinin rəisi Nəcəf Novruzov, Azərbaycan Cüdo Federasiyasının vitse-prezidenti Elnur Məmmədli, Avropa və dünya çempionları Rəsul Çunayev və Fuad Zeynalov, idarənin müvafiq struktur bölmə rəhbərləri, idmançılar, məktəb direktorları, müəllimlər, şagirdlər və digər qonaqlar iştirak ediblər.
Əvvəlcə qonaqlar idmanın müxtəlif növlərinə həsr olunmuş guşə ilə tanış olublar.
Tədbir Azərbaycan Respublikasının Dövlət Himninin səsləndirilməsi, ulu öndər Heydər Əliyev və Vətən şəhidlərinin xatirəsinin bir dəqiqəlik sükutla yad edilməsi ilə başlayıb.
Çıxış edən BŞTİ-nin müdiri Mehriban Vəliyeva ölkəmizdə idman siyasətinin təməlinin və inkişafının ümummilli lider Heydər Əliyevin adı ilə bağlı olduğunu diqqətə çatdırıb. Vurğulayıb ki, Heydər Əliyev ölkəmizə hələ birinci rəhbərliyi dövründə digər sahələrdə olduğu kimi, idmanın da inkişafına böyük qayğı göstərib.
M.Vəliyeva Ulu Öndərin milli maraqlara əsaslanmaqla həyata keçirdiyi çoxşaxəli siyasət strategiyasının bu gün Prezident İlham Əliyev tərəfindən inamla davam etdirildiyini bildirib.
Elm və Təhsil Nazirliyi və Bakı Şəhəri üzrə Təhsil İdarəsi tərəfindən idmanın inkişafı istiqamətində atılan müvafiq addımlardan bəhs edən idarə müdiri idman həftəsi çərçivəsində Ulu Öndərin 100 illik yubileyinə həsr olunmuş Birinci Bakı İdman Festivalını yüksək qiymətləndirib. Bildirib ki, bu kimi festivallara şagirdlərimizin həvəslə və sevinclə qatılması idman sahəsinin daha parlaq gələcəyindən xəbər verir.
Milli Məclis sədrinin müavini, parlamentin Gənclər və idman komitəsinin sədri Adil Əliyev, Milli Məclisin Komitə sədri, Universal Döyüş Federasiyasının vitse-prezidenti Sadiq Qurbanov çıxışlarında Azərbaycanın müstəqillik qazandığı ilk illərdə ulu öndər Heydər Əliyevin təməlini qoyduğu idman siyasətinin uğurundan, Prezident İlham Əliyevin idmana, idmançılara və bu sahədə çalışan mütəxəssislərə göstərdiyi böyük diqqət və qayğıdan bəhs ediblər. Həmçinin şagirdlər arasında idmana meyil və marağın gücləndirilməsi məqsədilə təşkil olunan belə festivalların mühüm əhəmiyyətindən danışıblar.
Festival V-XI sinif şagirdlərinin müxtəlif idman növlərində hazırladıqları çıxışlarla və bədii-musiqili proqramla davam edib.
Yaqut Ağaşahqızı, “İki sahil”
