Xocalı dəhşətləri mənim bir ömürlük dərdimdir. O gecə yaşananlar mənim gözlərim önündə baş verib. Qarlı-şaxtalı günlərdə beş gün Xocalı meşələrində qalmışam. Biz mühasirədə qalmışdıq, hara gedəcəyimizi bilmirdik, hər tərəfimiz düşmən idi.

Bu sözləri AZƏRTAC-a müsahibəsində son günədək Xocalıda tibb bacısı kimi çalışmış Səadət Zeynalova deyib.

“Xocalı hadisələrindən danışmaq o qədər də asan deyil. Fevralın 25-dən 26-na keçən gecə neçə-neçə əliyalın, azərbaycanlı qoca, qadın, uşaq qəddarlıqla qətlə yetirilib. Amma inanıram ki, Prezidentimizin rəhbərliyi ilə torpaqlarımızı geri qaytaracağıq. Xocalımıza geri dönmək bizim dərdimizə məlhəm olacaq.