Azərbaycanın uğurlarına qısqanclıqla yanaşan, baş verən hər bir hadisəni öz maraqlarına uyğun şəkildə təhlil etməkdə maraqlı olan  daxili bədxahlarımızın son günlər ölkəmizin enerji  təminatında mühüm rol oynayan  Mingəçevir İES-də baş verən qəza ətrafında yaratdıqları ajiotaj diqqətdən kənada qalmır. Dövlətimizin başçısı İlham Əliyevin göstərişi ilə qəzadan dərhal sonra xüsusi Dövlət Komissiyasının yaradılması, eyni zamanda  Prezident yanında  ölkənin enerji  sistemində  vəziyyətlə əlaqədar  müşavirənin keçirilməsi bir daha bu reallığı ortaya qoydu ki, həyata keçirilən siyasətin önündə insan amili dayanır, ən başlıcası vətəndaşların təhlükəsizliyinin təminatı əsasdır.  Prezidentin ictimai-siyasi məsələlər üzrə köməkçisi Əli Həsənovun qeyd etdiyi kimi, təəəssüf ki, insan fəalkətini, qəza və kriminal hadisələri dividend hesab edən şəxslər də tapılır.

    «Sapı özümüzdən olan baltalar”ın bu kimi ictimai fikri çaşdırmağa xidmət edən  əsassız təbliğatlarının ölkə ictimaiyyəti daim şahididir. Göstərilən cəhdlər bir daha bu ünsürlərin kimliyini ortaya qoyur. Dövlətimizin başçısı İlham Əliyev çıxışlarında hər zaman  bu qüvvələrin   bir adı olduğunu bildirir-xəyanətkarlar, antimilli ünsürlər: «Bizə qarşı çıxmaq istəyənlər isə öz iç üzünü bir daha  açmışlar.  Onlar bir daha göstərirlər ki,  müstəqilliyin  nə olduğunu başa düşmürlər. Bir daha göstərirlər ki,  qul psixologiyası ilə yaşayırlar. Bu qul psixologiyası ondan ibarətdir ki, daim bir böyük qardaş axtarışındadırlar.  Daim kiminsə ayağına yıxılmaq  istəyirlər. Daim  kiminsə ətəyindən tutub  yardım diləyirlər.  Yəni, budur, bugünkü Azərbaycanın siyasi mənzərəsi: Bir tərəfdə  Azərbaycan iqtidarı, müstəqil siyasət, ləyaqətli siyasət və heç  kimin qarşısında baş əyməmək siyasəti, digər tərəfdə  öz şəxsi maraqlarını təmin etmək üçün istənilən yola getməyə hazır olan antimilli, satqın, xain,- onlara heç qüvvə də  deyə bilmərəm,- ünsürlər, qruplar. Bax budur, bugünkü siyasi palitra.»

       Azərbaycanın uğurlarını inkar etməklə, dövlətin, xalqın mənafeyini, milli maraqlarını  arxa plana keçirməklə, bir sözlə, xəyanətkar əməlləri ilə satqın, xain imiclərini günbəgün təsdiqləyən dağıdıcı ünsürlər  xarici antiazərbaycan dairələrin əlində oyuncağa çevrilməklə siyasi qul olduqlarını bir daha təsdiqləyirlər.  Onların bugünkü canfəşanlıqları bizləri  həmin ünsürlərə unutmuş olduqları bir illik hakimiyyətləri dövründə ölkəni hansı problemlərlə üz-üzə qoyduqlarını xatırlatmaq məcburiyyətində qoyur. Zaman hakim, tarix isə yaddaşdır. Həmin ünsürlər unutmasınlar ki, bu gün  ictimai fikri çaşdırmağa nə qədər səy göstərsələr də bunun reallıq kimi qəbul olunması mümkünsüzdür. Bütün gerçəkliklərin şahidi olan xalqımız  həyata keçirilən siyasətin əsasında ölkənin hərtərəfli inkişafının, insanların  sosial rifahının, təhlükəsizliyinin təminatı dayandığını çox yaxşı görür. Cənab İlham Əliyevin çıxışlarında  yer alan əsas məqam bu olur ki,  ölkə əhalisinin sabit, təhlükəsiz şəraitdə yaşaması,   bütün qayğılarının təminatı əsasdır. Ən əsası cənab İlham Əliyev bütün dövlət məmurlarından xalqın qayğıları ilə yaşamağı, onları narahat edən bütün məsələlərin həllini tələb edir.  Qeyd etdiyimiz müşavirədə də cənab İlham Əliyev bildirmişdir: «Çox ciddi araşdırmalar aparılmalıdır, günahkarlar məsuliyyətə cəlb edilməlidir. Bir daha qeyd etmək istəyirəm, elə bir tədbirlər planı hazırlanmalıdır  ki, gələcəkdə  biz bu qəzalardan və qəzaların törədə biləcəyi  fəsadlardan özümüzü qoruya bilək.»

    Təbii ki, xalqımız reallığa dəyər verir. Gerçəkliklər Azərbaycanın uğurlarıdır. Ölkə Prezidenti müşavirədə  son illər  Azərbaycanın elektrik enerjisi ilə təminatı sahəsində görülən tədbirlərdən bəhs etmişdir. Bu rəqəmlər açıqlanmışdır ki,  son 15 ildə  Azərbaycanda  onlarla yeni  elektrik stansiyası istifadəyə verilmişdir. 2500  meqavat gücündə yeni elektrik stansiyaları  tikilmişdir.  Enerji potensialımız  hazırda  6400 meqavata bərabərdir. Ölkəmizin bütün bölgələrində - Bakı, Sumqayıt, Şirvan şəhərlərində,  Astara, Xaçmaz, Şəki, Quba rayonlarında yeni elektrik stansiyaları tikilib istifadəyə verilib.

    Təbii ki, bu kimi addımların atılması ölkəmizin dayanıqlı iqtisadi inkişafına əsaslanır. Ölkənin hərtərəfli inkişafında iqtisadi amilin rolunu önə çəkən dövlətimizin   bu istiqamətdə atdığı davamlı addımlar göz önündədir. Müxtəlif istiqamətləri əhatə edən strateji Yol  xəritələrinin  hazırlanması və icrası, «Azərbaycan 2020: Gələcəyə baxış» İnkişaf Konsepsiyasından irəli gələn vəzifələrin uğurlu icrası  uğurlarımızın fonunda müəyyənləşdirilən  hədəflərin gerçəkləşməsinə xidmət edir. Dövlətimizin başçısı İlham Əliyevin sədrliyi ilə keçirilən   Nazirlər Kabinetinin iclaslarında daim     insan amilinə diqqətdən irəli gələn addımların biri kimi   su, qaz, elektrik enerjisinin təminatı istiqamətində  görülən işlərin ümumi statistikası açıqlanır və qarşıda duran vəzifələrdən bəhs edilir. Bu kimi məsələlərin həlli eyni zamanda bazar iqtisadiyyatının əsas aparıcı qüvvəsi olan sahibkarlığın inkişafı  üçün əsas amillərdir. Dövlətin ali məqsədi məhz vətandaşların hüquq və azadlıqlarının  müdafiəsi ilə yanaşı,  yüksək rifahının təmin edilməsidir. Müşavirədə bu məqam da xüsusi vurğlanmışdır ki,  dünyanın hər bir ölkəsində heç kim  qəzadan sığortalı deyil. Onların baş verməməsi, yaxud baş verdiyi təqdirdə nəticələrin dərhal aradan qaldırılması üçün zəruri tədbirlərin görülməsi əsasdır ki,  Azərbaycan dövlətinin  atdığı addımlar göz önündədir. Lakin bir məqamı da unutmayaq ki,  baş verən qəzalar,  fəlakətlər  siyasi əqidəsindən, mənsubiyyətindən, iqtidarda, yaxud müxalifətdə təmsil olunmasından asılı  olmayaraq hər bir vətəndaşı narahat etməlidir. Bundan  çirkin məqsədlər üçün bəhrələnmək  ikrah doğurur.  Azərbaycan dövlətinin qətiyyəti, bu günümüz və gələyimiz üçün  işlənib hazırlanan və uğurla icra edilən inkişaf strategiyası hər bir sınaqdan üzü ağ çıxmağımıza əsas verir. «Sapı özümüzdən olan baltalar»ın  yaranmış  durumdan bəhrələnmək üçün  məkrli niyyətlərindən irəli gələn müxtəlif çağırışları da diqqətdən kənarda qalmadı. Amma bu ünsürlər unudurlar ki, onlar belə çağırışlarla ictimai fikri çaşdırmaq, xalqda özlərinə qarşı inam yaratmaq və dəstək əldə etmək  imkanında deyillər, yalnız və yalnız  iç üzlərini, simasızlıqlarını, dövlət, xalq   anlayışının  onlar üçün arxa planda dayandığını təsdiqləyirlər.  Ona görə də belə ünsürlərin  siyasi səhnədə  yeri yoxdur, onların meydanı iqtidarın gördüyü işlərin, əldə olunan uğarların fonunda daralıb.

Xülyanı gerçəklikdən ayırd edə bilməmək antimilli ünsürlərin   savadsızlığının, dar düşüncələrə malik olmalarının göstəricisidir. Ölkəmizin uğurları fonunda bu ünsürlərin  təbliğatlarının əsassızlığı, şəxsi maraqlarına xidmət edən dezinformasiyalar və xarici dairələr qarşısında  öhdəliklər  olduğu açıqlanır.

Yeganə Əliyeva,

«İki sahil»