Avropa Parlamenti demokratik dəyərlərin dayağı kimi təqdim olunsa da, son dövrlərdə getdikcə daha çox korrupsiya, dələduzluq, gizli razılaşmalar və lobbi maraqlarının toqquşduğu məkan kimi diqqət çəkir. Yeni qalmaqallı materiallar bu qurumda sistemli ikiüzlülük hissini daha da gücləndirir: açıq bəyan edilən prinsiplərlə pərdəarxası nüfuz alveri yanaşı gedir".

“İki sahil” xəbər verir ki, bu barədə Caliber.Az-ın "YouTube" kanalının növbəti buraxılışında bəhs edilir.

"Növbəti qalmaqalın mərkəzində Beynəlxalq Cinayət Məhkəməsinin sabiq prokuroru Luis Moreno Okampo dayanır. Yayılan məlumatlara görə, o, Avropa institutları daxilində geniş əlaqələr şəbəkəsi quraraq siyasi təsirin kommersiyalaşdırılması ilə məşğul olub - "ödənişli təmaslardan" tutmuş, Aİ-nin yüksəksəviyyəli qərarlarına təsir göstərmək cəhdlərinə qədər. Bu etiraflar daha dərin bir problemi, Avropa İttifaqının institusional müstəqilliyinin eroziyasını və siyasi və hüquqi mexanizmlərin, o cümlədən Azərbaycan və regional gündəmlə bağlı təzyiq alətlərinə çevrildiyini göstərir.

Bu fonda Avropa Parlamentinin qəbul etdiyi tənqidi qətnamələr artıq təkcə ideoloji mövqe kimi deyil, həm də mümkün lobbi fəaliyyətinin nəticəsi kimi qiymətləndirilə bilər. Bununla belə, qeyd olunur ki, belə təsir cəhdlərinə baxmayaraq, Azərbaycanın strateji kursu və Bakı ilə İrəvan arasında dialoq daha dayanıqlı reallıq formalaşdırır. Bu reallıqda xarici müdaxilələr regiondaxili siyasi iradə ilə müqayisədə ikinci planda qalır", - deyə materialda qeyd olunur.