Cənubi Koreyada bir qadın iki kişinin qətlini planlaşdırmaq üçün süni intellekt platforması “ChatGPT”dən istifadə etməkdə şübhəli bilinir.

“İki sahil” xarici KİV-ə istinadən xəbər verir ki, 21 yaşlı, soyadı Kim olan qadın eyni üsuldan – dərmanları spirtli içkiyə qatmaqdan istifadə etməklə ayrı-ayrı hadisələrdə iki kişini öldürməkdə ittiham olunur.

O, fevralın 11-də saxlanılıb və ilkin olaraq ölümlə nəticələnən bədən xəsarəti yetirmə maddəsi ilə cinayət işi açılıb. Lakin telefon tarixçəsi onun mümkün nəticələrdən xəbərdar olduğunu göstərdiyi üçün ittiham sonradan qəsdən adam öldürmə maddəsinə dəyişdirilib.

Seulun Qanqbuk polis idarəsi qadının mobil telefonundakı məlumatları araşdırdıqdan sonra onun ChatGPT-yə dəfələrlə belə suallar verdiyini müəyyən edib: “Yuxu dərmanlarını spirtlə qəbul etsən nə baş verir?”

O, həmçinin yazıb: “Təhlükəli olması üçün neçə ədəd qəbul etmək lazımdır?” və “Bu, kimisə öldürə bilərmi?”

“Kim ChatGPT-də dərmanlarla bağlı sualları dəfələrlə verib. O, spirtin dərmanlarla birlikdə qəbulunun ölümlə nəticələnə biləcəyini tam şəkildə anlayırdı,” – polis müstəntiqi bildirib.

Polisin sözlərinə görə, Kim əvvəllər benzodiazepin tərkibli reseptli sakitləşdirici dərmanları kişilərin içkilərinə qatdığını etiraf edib, lakin bunun ölümə səbəb ola biləcəyini bilmədiyini israr edib.