Avropa Komissiyası çərşənbə günü müharibə səbəbindən iqtisadi cəhətdən əziyyət çəkən və Rusiya, Belarus, Ukrayna ilə həmsərhəd olan Aİ ölkələrinə investisiya qoymaq planlarını açıqlayacaq.

“İki sahil” xəbər verir ki, investisiya həcminin və yükdaşımalarının azalması, turizm sektorunda tənəzzül Aİ-nin ən şərq bölgələrinə iqtisadi zərbə vurub və Baltikyanı ölkələrə, Finlandiyaya, Polşaya daha çox təsir edib. Komissiyanın strategiyası beynəlxalq maliyyə qurumlarına bu ərazilərə maliyyə vəsaiti ayırmaq üçün stimul verməyə yönəlib.

“Ən təhlükəsiz sərhədlər yalnız nəzarət altında olanlar deyil, həm də inkişafdan qalmayanlardır” -deyə Finlandiyanın Turku şəhər şurasının və Avropa Regionlar Komitəsinin Ukrayna üzrə işçi Qrupunun üzvü Nina Ratilainen bildirib. O əlavə edib ki, Aİ sərhəd bölgələrində iş yerlərinə, təmiz enerjiyə və təhsilə investisiya yatırmaqla real təhlükəsizliyin təməlini qoyur.

Komissiya rəsmisi bildirib ki, Aİ-nin ən şərq bölgələrində əhali azalarsa, Avropanın sərhədini müdafiə etmək qabiliyyəti də təhlükəyə atıla bilər. Brüssel, həmçinin regionlarda yaşayanların üzləşdiyi iqtisadi çətinliklərin onların seçkilərdə kənar partiyalara üz tutmasına və Rusiya təbliğatına qarşı həssas olmasına səbəb ola biləcəyindən narahatdır.

Polşanın Podkarpatski bölgəsinin qubernatoru Vladislav Ortil qeyd edib ki, bu ərazilər davam edən müharibənin nəticələrindən, o cümlədən miqrasiya təzyiqindən, nəqliyyatın pozulmasından, ictimai xidmətlərə və regional iqtisadiyyata artan gərginlikdən birbaşa təsirlənir. O əlavə edib ki, geosiyasi gərginliyin artması Aİ-nin resurslarını sərhəd ərazilərinin dayanıqlığını gücləndirmək üçün yenidən bölüşdürməli olduğu anlamına gəlir.

Planın prioriteti, istər turizmin olmaması, istərsə də Ukrayna sərhədi yaxınlığında yaşamaqla bağlı təhlükələr səbəbindən Rusiyanın işğalı nəticəsində iqtisadi cəhətdən depressiyaya düşmüş əraziləri canlandırmaqdır.