Biləsuvar rayonunun Günəşli kəndində boya-başa çatan 44 günlük haqq savaşımızda  Vətənin azadlığı uğrunda şəhidlik zirvəsinə ucalan  Müşfiq Zakir oğlu Xosizadənin  xatirəsi  bütün Azərbaycan xalqı tərəfindən  müqəddəs tutulur və onun  26 ilik şərəfli ömür yolu örnək göstərilir.  Qərinələr keçəcək, yenə də belə olacaq. Çünki Müşfiq öz adını  qəhrəmanlıq tariximizə qanı bahasına əbədi olaraq həkk edib.

Canından artıq sevdiyi Vətən,  torpaq uğrunda son nəfəsinədək vuruşan Müşfiq Zakir oğlu  özünü biləndən Erməni işğalçıların ölkəmizin müqəddəs guşəsi olan Qarabağa  hücum  ilə  heç cür barışmayıb.  Yaşının üstünə yaş gələndə dığalara nifrəti daha da artıb.  Odur ki, orta məktəbi yaxşı qiymətlərlə bitirsə də, Vətənin  çətin günündə əsgər olub onun keşiyində durmağı  hər şeydən üstün tutub.  Böyük həvəslə ordu sıralarına yollanıb və cəbhə bölgəsində xidmətə başlayıb. Yurduna olan halal sevgisi qısa zaman kəsiyində onu  nümunəvi əsgər kimi komandirlərin sevimlisi edib. Müqəddəs borcunu şərəflə yerinə yetirən Müşfiq  məqamı gələndə yağıdan alacağı öcə də ciddi hazırlaşıb.  Məqsədinə çatmaq üçün qatıldığı çətin təlimlərdən  belə uğurla çıxıb, necə qəhrəman, igid  oğul  olduğu  bilinib. Valideynlərinin yanına qələbə sorağı ilə qayıtmaq istəyində olan Müşfiq əsgərlik həyatını başa vuran kimi yenidən hərbiyə yazılıb.  Dediyi də belə olub:” Çox az qalıb. İnşallah qeyrətli oğullarımızın  hesabına erməni dığalarının  başını əzib, Qarabağımızı  azad edərik. Onda məndə ata-anamın yanına  alnıaçıq, başıuca, ən əsası qalib xalqın oğlu olaraq  dönərəm.”

Andına sadiq qalan Azərbaycan Silahlı Qüvvələrinin giziri Müşfiq Xoşizadə   İkinci Qarabağ müharibəsi başlanan günü Vətənin müdafiəsinə  qalxıb və bu müqəddəs yolda şəhid olmağı özünə şərəf sayıb. Düşməni məğlub edib Qarabağı azad görmək istəyi ilə o,  silaha sarılıb  neçə-neçə qanlı döyüşlərdən zəfərlə çıxıb. Vuruşduğu ağır, ölüm-dirim savaşında silahının nişangahına tuş gələn onlarla  erməni qəsbkarını məhv edib. Ürəyi Vətən eşqi ilə döyünən Müşfiqi yalnız 30 il düşmənə əsir düşən Qarabağın azadlığı düşündürüb. Füzuli uğrunda gedən döyüşlərdə  göstərdiyi qəhrəmanlıqla tarix yazıb.  Təəssüflər olsun ki, elə  bu savaş zamanı düşmən tərəfindən açılan qəfil bir atəş onun bütün arzularını yarımçıq qoyub. Vətən naminə canından keçməklə  bir evin oğlundan, bir elin, bir xalqın övladına çevrilib və əbədi olaraq doğulduğu kənd qəbiristanda sevdalandığı torpağın sinəsinə baş qoyub. Həm də milyonların qəlbində özünə yuva quran Biləsuvarın qəhrəman oğlu  ölümündən sonra  Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün  Prezidenti, Ali Baş komandan  İlham Əliyevin  Sərəncamları əsasında    "Vətən uğrunda", "Füzulinin azad olunmasına görə" və “Döyüşlərdə fərqlənməyə görə” medallarına  layiq  görülüb.

Yurdumuzun azadlığı uğrunda başlayan döyüşlərdə son nəfəsinədək cəsarətlə, hünərlə vuruşub şəhidlik zirvəsinə ucalan Müşfiq Xoşizadə  ilə bütün Azərbaycan xalqı fəxr edir. Müşfiq kimi Vətənini canından da çox sevən oğullar heç zaman ölmürlər.

Zəfər Orucoğlu,
Azərbaycan Jurnalistlər Birliyinin üzvü