Azərbaycan Respublikasının müasir inkişaf mərhələsi güclü dövlətçilik ənənələri, ardıcıl siyasi kurs və milli maraqlara əsaslanan idarəetmə modeli ilə səciyyələnir. Bu inkişafın mərkəzində Azərbaycan Respublikasının Prezidenti cənab İlham Əliyevin çoxşaxəli və sistemli fəaliyyəti dayanır. Onun rəhbərliyi dövründə Azərbaycan daxili siyasi sabitliyini möhkəmləndirmiş, iqtisadi müstəqilliyini təmin etmiş, beynəlxalq münasibətlər sistemində etibarlı və prinsipial tərəfdaş kimi mövqeyini daha da gücləndirmişdir.
Prezident cənab İlham Əliyevin fəaliyyəti müasir Azərbaycan dövlətçiliyinin möhkəmlənməsinə, milli maraqların qorunmasına və ölkənin uzunmüddətli inkişaf strategiyasının uğurla həyata keçirilməsinə xidmət edir.
Prezidentlik dövrü və siyasi sabitliyin təmin olunması
Vətəndaş üçün ən böyük nemət daxili sabitlikdir. Qlobal dünyada xaosun, müharibələrin və dövlətlərin iflasının yaşandığı bir dövrdə Azərbaycanın "sabitlik adası" kimi qalması təsadüfi deyil. Bu sabitlik təkcə daxili asayişin qorunması deyil, Prezident İlham Əliyevin son 22 ildə həyata keçirdiyi uzaqgörən dövlətçilik kursunun, xalq-iqtidar birliyinin və sarsılmaz milli iradənin məntiqi nəticəsidir. 2025-ci ilin "Konstitusiya və Suverenlik İli" elan edilməsi bu sabitliyin hüquqi və siyasi zirvəsini təşkil edir
İlham Əliyevin prezidentlik dövrü Ümummilli Lider Heydər Əliyevin siyasi varislik xəttinin uğurla davam etdirilməsi ilə səciyyələnir. Bu kurs daxili sabitliyi təhdid edə biləcək bütün riskləri – istər xarici təzyiqlər, istərsə də daxili parçalanma cəhdləri olsun – neytrallaşdırmağa nail olmuşdur. 2024-cü ilin fevralında keçirilən prezident seçkilərində xalqın mütləq dəstəyi bir daha təsdiqlədi ki, Azərbaycandakı siyasi sabitlik süni xarakter daşımır, xalqın öz liderinə olan inamına söykənir.
Prezidentin siyasi sabitliyi qorumaq metodlarından biri də cəmiyyətdə barışıq və humanizm mühitini təmin etməkdir. 2025-ci ilin dekabrında imzalanan genişmiqyaslı amnistiya aktı və əfv sərəncamları dövlətin gücünü deyil, humanist mahiyyətini nümayiş etdirir. Bu addımlar dövlət-vətəndaş münasibətlərini daha da sıxlaşdırır və radikal meyllərin qarşısını alır.
İqtisadi siyasət və dayanıqlı inkişaf strategiyası
Prezident İlham Əliyevin iqtisadi siyasəti rasional və uzunmüddətli strateji yanaşmaya əsaslanır. Neft gəlirlərinin səmərəli idarə olunması və qeyri-neft sektorunun inkişafı iqtisadi siyasətin əsas istiqamətlərini təşkil edir. Bu məqsədlə regionların sosial-iqtisadi inkişafına dair dövlət proqramları qəbul edilmiş və ardıcıl şəkildə icra olunmuşdur.
Həyata keçirilən infrastruktur layihələri nəticəsində ölkənin bütün bölgələrində yol, elektrik, qaz, su və rabitə təminatı əhəmiyyətli dərəcədə yaxşılaşdırılmışdır. Enerji sahəsində reallaşdırılan beynəlxalq layihələr Azərbaycanın regional və qlobal enerji təhlükəsizliyində mühüm rolunu təmin etmişdir.
Sosial siyasət və əhalinin rifah halının yüksəldilməsi
Azərbaycanın dinamik iqtisadi inkişafı və artan maliyyə imkanları Prezident İlham Əliyevin rəhbərliyi ilə vətəndaş məmnuniyyətinə, əhalinin sosial müdafiəsinin daha da gücləndirilməsinə xidmət edir. Yeni sosial islahatlar paketi bir daha təsdiqləyir ki, Azərbaycan dövlətinin siyasətinin mərkəzində ölkə vətəndaşı və onun rifahı dayanır.
Müasir Azərbaycan dövlətçiliyinin ən mühüm prinsiplərindən biri güclü iqtisadiyyatın sosial rifahla vəhdət təşkil etməsidir. Dövlət başçısı İlham Əliyevin müəllifi olduğu sosial inkişaf strategiyası ölkəmizi postsovet məkanında və regionda ən qabaqcıl sosial dövlətlərdən birinə çevirib. Xüsusilə son illərin qlobal iqtisadi çağırışları fonunda Azərbaycanın sosial proqramların icrasını nəinki dayandırmaması, əksinə, daha da genişləndirməsi milli inkişaf modelimizin dayanıqlılığının göstəricisidir.
Xüsusilə qeyd etmək lazımdır ki, şəhid ailələri, müharibə əlilləri və qazilərin sosial təminatı Prezidentin diqqət mərkəzindədir. Minlərlə ailə yeni mənzillərlə təmin olunmuş, reabilitasiya və sosial xidmət infrastrukturu genişləndirilmişdir. Bu siyasət dövlət-vətəndaş münasibətlərinin möhkəmləndirilməsinə xidmət edir.
Dəmir Yumruq: Qürurumuzun Bərpası
Prezident İlham Əliyevin dövlətçilik fəaliyyətinin ən mühüm mərhələsi Qarabağ məsələsinin həlli ilə bağlıdır. Hər bir azərbaycanlı vətəndaşın daxilində 30 illik bir nisgil var idi – Qarabağ dərdi. Müzəffər Ali Baş Komandan İlham Əliyevin fəaliyyətinin ən möhtəşəm hissələrindən biri də məhz bu dərdi qələbə sevinci ilə əvəzləməsi oldu. O, illərlə səbir göstərdi, ordunu addım-addım hazırladı, beynəlxalq arenada Azərbaycanın haqlı səsini çatdırdı. 2020-ci ilin 44 günlük Vətən Müharibəsi zamanı Ali Baş Komandanın xalqa müraciətləri hər birimizi bir yumruq kimi birləşdirdi. O, təkcə torpaqları azad etmədi, həm də bizim başımızı dik tutmağımızı təmin etdi. Bu gün Şuşada ucalan bayrağımız Müzəffər Ali Baş Komandan İlham Əliyevin milli qürur siyasətinin ən ali nöqtəsidir.
Qələbədən sonra azad edilmiş ərazilərin bərpası və yenidən qurulması dövlət siyasətinin əsas prioritetinə çevrilmişdir. Qarabağ və Şərqi Zəngəzurda həyata keçirilən genişmiqyaslı tikinti və infrastruktur layihələri uzunmüddətli inkişaf strategiyasına əsaslanır.
Bu gün biz "Böyük Qayıdış"ın şahidləriyik. Dağıdılmış şəhərlərin yerində yüksələn "ağıllı" kəndlər, Qarabağın səmasında uçan təyyarələr dövlətimizin iqtisadi gücünün və prezidentin yaradıcı ruhunun simvoludur. İlham Əliyevin rəhbərliyi ilə Azərbaycan artıq müdafiə olunan tərəf deyil, diktə edən və regionun gələcəyini müəyyənləşdirən tərəfdir.
Seyfəddin Əliyev,
YAP Masallı rayon təşkilatının sədri
