Avropa İttifaqının sanksiyalar üzrə elçisi Devid O'Sullivanın bu yay Vaşinqtona səfəri zamanı ABŞ hakimiyyəti onu Ukrayna sazişini imzaladıqdan sonra Rusiyanın dondurulmuş aktivlərini geri qaytarmaq planları barədə məlumatlandırıb.

“İki sahil” xəbər verir ki, "Politico" bu barədə mənbələrə istinadla məlumat yayıb.

Nəşr yazır ki, ABŞ-ın 28 maddəlik sülh planının ilkin layihəsinə ABŞ-ın himayəsi altında "Ukraynanın yenidən qurulması və iqtisadiyyatına investisiya qoyulması" səylərinə 100 milyard dollarlıq aktivlərin göndərilməsi daxil idi. "Politico"nun mənbələrinə görə, Avropa rəsmiləri ABŞ-ın nominal olaraq Ukraynanın yenidən qurulması üçün istifadə ediləcək aktivlərin bir hissəsini götürməsi və "qalan hissəsinin Rusiya ilə bölünməsi" perspektivindən qəzəbləniblər.

Rusiyanın Avropada dondurulmuş aktivlərinin dəyəri təxminən 210 milyard avrodur. Bunlardan təxminən 185 milyard avrosu Belçikanın Euroclear depozitarında saxlanılır. Belçika Aİ ölkələrindən "qanuni olaraq məcburi, qeyd-şərtsiz və geri qaytarılmayan" kredit zəmanətləri vermələrini tələb edib. Həmçinin, potensial məhkəmə çəkişmələri ilə bağlı bütün hüquqi risklərin bütün Aİ ölkələri arasında bölüşdürülməsində israrlıdır. Rusiya aktivləri ilə bağlı yekun qərar dekabrın 18-də verilə bilər.