İkinci Qarabağ müharibəsində  qeyrətli Vətən övladlarının qanı bahasına Azərbaycan Ordusu yağı üzərində şanlı qələbə qazandı. Beləliklə 30 il əsir düşən torpaqlar  azad olundu, xoşbəxt günlərimiz başlandı. Bu tarixi zəfərdə  1995-ci ildə Biləsuvar rayonunun Günəşli kəndində dünyaya gələn Vüsal Qənbərli də Vətən, torpaq naminə son damla qanına qədər  döyüş meydanından çıxmadı. Polad sinəsi ilə yağı gülləsini dəf edən igid “Təki Vətən yaşasın”- deyə gözlərini əbədi yumdu.  Onun göstərdiyi igidlik və qorxmazlıq gənclərimiz üçün örnəyə, xalqımız üçün qürur mənbəyinə çevrildi. Düşmənin 23 saat 43 dəqiqəlik müqaviməti məhz belə qəhrəman oğulların sayəsində puç oldu.  Bununla da Azərbaycanın yeni tarixi yazıldı,  Vüsal  ölümsüzlüyə qovuşdu, xalqının ürəyində özünə yer etməklə şəhid adı dövlət tərəfindən  3-cü dərəcəli “Vətənə xidmətə görə” ordeninə, “Vətən uğrunda”, Xocavəndin və Cəbrayılın azadlığına görə medallara layiq görüldü. Nəticədə igid Vətən sevdalısı torpağa gömülmədi, yeni bir həyat yaşamaq üçüm əlçatmaz, ünyetməz göylərə ucaldı. Vüsal cismən aramızda olmasa da, hər zaman Vətəni, milləti sevənlərin könüllərində  sevilə-sevilə bəslənilər.

Azərbaycan xalqının  iftixar mənbəyi  olan şəhid Vüsal Qənbərli ayağı yer tutub tam torpağa bağlandıqdan  sonra ailəsi ilə bərabər Qaradağ rayonuna köçüblər. Qanında  Vətən eşqi, el sevdası axan Vüsal orta məktəbi bitirəndə cəmiyyətdə ən çox sevilən gənclərdən olub.  Əsgərlik yaşı çatanda böyük həvəslə ordu  sıralarına gedib. Cəbhə bölgəsində- Füzulidə müqəddəsliyinə tapınan, canından artıq sevdiyi Azərbaycanı göz-bəbəyi kimi qoruyub. Komandirlərin tapşırıqlarını vaxtında, düzgün yerinə yetirib, həm də onların qarşısında müharibə olsa Vətən torpaqlarının  hər qarışı uğrunda döyüşəcəyinə and içib. Cəsurluğu, mərdliyi, igidliyi  əsgərlərə nümunə göstərilən Vüsal ordudan  evə  dönsə  da,  qana  susamış düşməni qanda boğmaq   onun əsas amalı olaraq  qalıb.

Amalına sadiq qalan Vüsal Qənbərli Azərbaycan Respublikasının ərazi bütövlüyü uğrunda 27 sentyabr 2020-ci il tarixində başlanan haqq savaşımızın əvvəlində ilk qoşulan könüllü döyüşçü olub. O, əlinə silah alıb şüurlu sürətdə, qorxmadan Vətənin müdafiəsinə qalxıb.  Mübarizə meydanına girən gündən  erməni dığaların kabusuna çevrilməklə onların layiqli cavabını verə bilib.  Qubadlıda yağıya vurduğu sarsıdıcı zərbələri daha sərt olub. Düşmən xeyli itki ilə geri çəkilib. Qəhrəmanlığı dillərdən düşməyən, ağır müharibə meydanlardan zəfərlə çıxan Vüsal Qənbərli  Xocavənd istiqamətində gedən döyüşdə düşmən hücumunun qarşısını alarkən şəhid olub, 20 dekabr 2020-cü ildə doğulduğu Günəşli kəndində torpağa tapşırılıb...

Zəfər  Orucoğlu,
Azərbaycan Jurnalistlər Birliyini üzvü