Avqustun 30-da saat 15:50 radələrində Almatı vilayətinin (Qazaxıstan) Karasay rayonunun Turar kəndi yaxınlığında baş verən yanğında 3 nəfərin yanmış meyiti tapılıb.

“İki sahil” xəbər verir ki, bu barədə Zakon.kz məlumat yayıb.

Bildirilib ki, yanğında 30 ha sahədə quru ot yanıb. Sosial şəbəkələrdə yanğın yerində 3 yanmış cəsədin tapıldığı barədə məlumat yayılıb. Bununla bağlı Almatı vilayət yanğınsöndürmə idarəsinin mətbuat xidmətindən verilən məlumata görə, yanğın quru otdan ümumi sahəsi 531 m2 olan 7 bağ evi və 6 təsərrüfat binasına, həmçinin “Honda Civic” markalı minik avtomobilinə, 132 kv.m tövlə və həyətyanı sahəyə, 80 kv.m yaşayış binasına keçib: "İlk bölmələr gələn zaman bütün bina tamamilə yanıb. Almatı vilayət fövqəladə hallar idarəsinin, Almatı şəhər fövqəladə hallar idarəsinin və yerli icra orqanlarının birləşmiş qüvvə və texnikası yanğının söndürülməsi üçün səfərbər edilib: 27 nəfər və 10 texnika. Almatı vilayət fövqəladə hallar departamentinin operativ tədbirləri sayəsində yanğının qarşısı saat 00:20-da alınıb".

Şöbə yanğın yerində 3 yanmış cəsədin tapıldığını da təsdiqləyib.

Əlavə edilib ki, məhkəmə-tibbi ekspertizası təyin edilib. Almatı vilayət fövqəladə hallar departamentinin təhqiqat qrupu yanğının səbəblərini müəyyən etmək üçün işləyir.

Məhərrəm Ağalaroğlu, “İki sahil”