"Mançester Yunayted"in baş məşqçisi Ruben Amorim komandanın heyətinin komplektləşdirilməsi haqda danışıb. 

“İki sahil” İngiltərə klubunun mətbuat xidmətinə istinadən xəbər verir ki, o deyib: "Əla komandamız var. Hazırkı heyətdən daha çox şey almaq mümkündür. Mateus Kunya və Brayan Mbeumonu daha yaxından öyrənmək üçün apardığımız iş çox vacib idi. Onlar həm yaxşı insanlar, həm də istədiyimiz səviyyədə futbolçular çıxdılar.

Komanda – mənim işimin əksidir. Ona görə də yaxşı nəticə qazandıqda daha xoşbəxt ola bilmərəm. Oyunçular əllərindən gələni edir – bu, ən vacib məqamdır. Heyətin formalaşdırılması prosesində inamla hərəkət etmişəm. Çünki nə etdiyimizi bilirdik və bizə lazım olan heyət barədə konkret təsəvvürümüz vardı".

Qeyd edək ki, "Mançester Yunayted" avqustun 4-də "Everton", avqustun 9-da isə "Fiorentina" ilə yoldaşlıq oyunu keçirəcək. Premyer Liqanın yeni mövsümündə Amorimin komandası ilk turda – 17 avqustda "Arsenal"la qarşılaşacaq.