Polşa Xarici İşlər Nazirliyi ölkə vətəndaşlarına ikitərəfli münasibətlərdə vəziyyət sabitləşənə qədər Rusiyaya səfərlərdən çəkinməyi tövsiyə edib. Diplomatik şöbə Rusiya ərazisindəki polyakları sayıq olmağa çağırıb.

“İki sahil” xəbər verir ki, bu barədə diplomatik idarənin X sosial şəbəkə hesabında məlumat yayılıb.

"Rusiyadakı Polşa konsulluq işçilərinin sayının azalması ilə əlaqədar olaraq, Polşa vətəndaşlarına yardım göstərmək imkanı məhduddur", - diplomatik idarə qeyd edib.

İyunun 27-də Polşa tərəfinin təşəbbüsü ilə Rusiyanın Krakovdakı diplomatik missiyası fəaliyyətini dayandırıb. Yerli hakimiyyət orqanları öz qərarlarını 2024-cü ildə Varşavada “Marywilska 44” ticarət mərkəzinin yandırılmasında Rusiyanın əli olması ilə bağlı məlumatların olması ilə izah ediblər. Buna cavab olaraq Rusiya Xarici İşlər Nazirliyi Polşanın Kalininqraddakı Baş Konsulluğunu avqustun 29-dan etibarən bağlamaq planlarını açıqlayıb.