Milli Məclisin sədri Sahibə Qafarova parlament nümayəndə heyəti ilə birlikdə Özbəkistana səfər edib.

“İki sahil” yerli KİV-ə istinadla xəbər verir ki, səfərin məqsədi 1-2 iyul tarixlərində Xivə şəhərində keçiriləcək Birinci Özbəkistan-Azərbaycan parlamentlərarası forumunda iştirak etməkdir.

Nümayəndə heyətini Özbəkistan Ali Məclisi Senatının sədri Tanzila Narbayeva qarşılayıb.

Senatın məlumatına görə, forumda Özbəkistan və Azərbaycan parlamentlərinin nümayəndələri ilə yanaşı, hər iki ölkənin Gənclər parlamentlərinin nümayəndələri də iştirak edəcəklər.

Forumun məqsədi parlamentlərarası əməkdaşlığı daha da dərinləşdirmək, qanunvericilik fəaliyyəti və parlament nəzarətinin həyata keçirilməsi ilə bağlı təcrübə mübadiləsi aparmaq, həmçinin ən yüksək səviyyədə əldə edilmiş razılaşmaların reallaşdırılmasına kömək etməkdir.

Forumun sonunda strateji tərəfdaşlığın daha da möhkəmləndirilməsi, prioritet sahələrdə ikitərəfli əməkdaşlığın genişləndirilməsi, həmçinin birgə təşəbbüslərin səmərəli həyata keçirilməsi üçün hüquqi əsasların təkmilləşdirilməsinə yönəlmiş yekun sənədin qəbul edilməsi nəzərdə tutulur. Qeyd olunur ki, sənəd birgə təşəbbüslərin həyata keçirilməsi, həmçinin iqtisadiyyat, mədəniyyət, təhsil və təhlükəsizlik kimi sahələrdə əməkdaşlığın genişləndirilməsi üçün əsas olacaq.