Cari ilin ilk rübü ərzində İpoteka və Kredit Zəmanət Fondu (İKZF) vəsaiti hesabına 124,9 milyon manat məbləğində 1251 ipoteka krediti rəsmiləşdirilib ki, onun da 41,9 milyon manatı (508 kredit) güzəştli ipoteka kreditlərinin payına düşür.

“İki sahil” xəbər verir ki,  Fonddan bildirilib ki, ümumilikdə 2006-cı ildən indiyədək İKZF-nin vəsaiti hesabına 3,4 milyard manatdan çox ipoteka krediti verilib. Bunun 988,5 milyon manatı güzəştli ipoteka kreditləridir. Verilmiş kreditlər hesabına 53 min 829 ailə özünün mənzil şəraitini yaxşılaşdırıb. İpoteka kreditlərindən faydalananların 67 faizi gənclər və gənc ailələrdir.

Şəxsi yığımları yetərli olmayan əhalinin daha aşağı ilkin ödənişlə ipoteka kreditindən faydalanmasını təmin etmək məqsədilə 31 mart tarixinə fond tərəfindən ümumilikdə 107,4 milyon manat məbləğində 1211 sayda zəmanətli ipoteka krediti verilib.

Dövr ərzində ipoteka bazarında müvəkkil banklar arasında rəqabət mühitinin gücləndirilməsi davam etdirilib, ipoteka kreditləri üzrə maksimal faiz dərəcəsinin illik 8 faiz müəyyən olunmasına baxmayaraq, bir sıra banklar tərəfindən daha aşağı faiz dərəcələri ilə ipoteka kreditlərinin verilməsi davam etdirilib. Nəticədə, 2025-ci ilin ilk rübü ərzində adi ipoteka kreditləri üzrə orta illik faiz dərəcəsi 7,5 faiz təşkil edib.

Qeyd edək ki, İpoteka və Kredit Zəmanət Fondu 2006-cı ildən etibarən ölkədə uzunmüddətli ipoteka kreditləşməsinin maliyyələşdirilməsini həyata keçirir. Azərbaycan Respublikası Prezidentinin 2016-cı il 22 iyun tarixli Fərmanı ilə təsdiq edilmiş “Azərbaycan Respublikası İpoteka və Kredit Zəmanət Fondunun vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası”na uyğun olaraq, Fond 2025-ci ilin birinci rübündə də əhalinin mənzil təminatının yaxşılaşdırılması istiqamətində fəaliyyətini davam etdirib.