ABŞ Prezidenti Donald Trampın administrasiyası ABŞ-nin bir sıra ştatların federal qurumlarının işçilərini əhəmiyyətli dərəcədə ixtisar etmək niyyətindədir; bəzilərində işçilərin sayı 50 % azaldıla bilər.

"İki sahil" xəbər verir ki, bu barədə cümə axşamı "The Washington Post" məlumat yayıb. Nəşrin jurnalistləri tərəfindən əldə edilən Ağ Evin daxili sənədlərinə görə, Amerika hökumət rəsmiləri Tramp administrasiyasının hökumət aparatının həcmini azaltmaq proqramının birinci mərhələsində dövlət aparatı işçilərinin 8 %-dən 50 %-yə qədərini ixtisar edəcəyinə hazırlaşır. Sənədlərdə “ABŞ-nin 2,3 milyonluq bürokratik aparatının yenidən təşkili” ilə bağlı ilkin planlar öz əksini tapıb.

Sənədlərə əsasən, ABŞ-nin Mənzil və Şəhərsalma Nazirliyi hazırda 8,3 min nəfərə yaxın olan işçilərinin yarısını ixtisar etməyi planlaşdırır. Daxili İşlər Nazirliyində işçilərin sayının dörddə bir, Ticarət Nazirliyi, Maliyyə Nazirliyi və Daxili Gəlirlər Xidmətində (ölkənin əsas vergi yığım orqanı) təxminən üçdə bir, Ədliyyə Nazirliyində isə 8 faiz azalacağı gözlənilir. Planlar ABŞ-ın 22 federal qurumuna aiddir. Bütün qurumlarla bağlı məlumat verilmir.

Ağ Evin mətbuat katibinin müavini Harrison Filds nəşrə bildirib ki, sənədlər administrasiyanın yekun planlarını deyil, yalnız ilkin planlarını əks etdirir. O, qurumların işçilərinin sayında əhəmiyyətli ixtisarın hazırlandığını təsdiqləyib.