23 fevral 2025 17:22
120

AFFA-dan “Turan Tovuz”a cavab:  Fakt varsa, təqdim edilsin

AFFA “Turan Tovuz” klubunun “Şamaxı” ilə matçdan əvvəlki bəyanatatına reaksiya bildirib.

Bölgə təmsilçisi əlverişsiz hava şəraitinə görə VAR sisteminin və canlı yayımın olmayacağını oyunun şəffaf keçirilməsinə şübhə yaratması ilə əlaqələndirib. 

AFFA “Turan Tovuz”un bəyanatına cavab olaraq belə açıqlama yayıb:

“Ölkə ərazisində qarlı hava şəraiti ilə əlaqədar oyunların keçiriləcəyi stadionlarda müəyyən çətinliklər yaranıb. Misli Premyer Liqasının 24-cü turunun “Şamaxı” – “Turan Tovuz” oyununun keçirildiyi Şamaxı şəhərində güclü qar yağmasına baxmayaraq, stadion qardan təmizlənib və oyuna hazır vəziyyətə gətirilib.

Azərbaycan Premyer Liqasının Əsasnaməsində oyun canlı yayımlanmasa və ya VAR sistemi tətbiq olumasa, matçın keçirilməməsi ilə bağlı heç bir şərt yoxdur. Belə ki, meydançanın durumu imkan verdiyi halda, komandalar, hakimlər, hakim-inspektor, AFFA nümayəndəsi, təcili-tibbi yardım maşını stadionda olduğu təqdirdə, həmçinin təhlükəsizliklə bağlı hər hansı problem olmasa, oyun baş tutmalıdır.

“Turan Tovuz” PFK-nın “Şamaxı” ilə oyundan əvvəlki bəyanatı AFFA-nı məyus edir. Artıq birinci dəfə deyil ki, “Turan Tovuz” PFK hakimlərlə bağlı xoşagəlməz fikirlər səsləndirir. Əgər “Turan Tovuz” PFK-nın bununla bağlı hər hansı faktları və sübutları varsa, klubdan xahiş olunur ki, ən qısa müddətdə AFFA-ya təqdim olunsun. Əks halda məsələyə AFFA İntizam Komitəsi tərəfindən baxılacaqdır və müvafiq tədbirlər görüləcəkdir”.

Qeyd edək ki, artıq başa çatan görüş “Turan Tovuz”un qələbəsiylə başa çatıb – 1:0.

Fanat.Az