Türkiyənin ən böyük inteqrasiya olunmuş sənaye qrupu "SOCAR Türkiyə", eyni zamanda, idmanın birləşdirici və transformativ gücünə olan inamı ilə müxtəlif idman sahələrinə verdiyi dəstəyi artıraraq davam etdirir.

Belə ki, “SOCAR Türkiyə”nin qrup şirkətlərindən olan “Petkim” Petrokimya Holding A.Ş. tərəfindən qurulan “Aliağa Petkimspor” 1984-cü ildən etibarən basketbol sahəsində kişilər arasında liqada fəaliyyət göstərir. 2012-2014-cü illərdə Türkiyənin basketbol üzrə 2-ci liqasında, 2014-2020-ci illərdə isə Türkiyə Basketbol Liqasında iştirak edən komanda 2020-ci ildən etibarən Türkiyə Basketbol Super Liqasında (BSL) mübarizə aparır. “Aliağa Petkimspor” 2023-2024-cü il mövsümündə BSL-də Türkiyənin ən köklü və uğurlu basketbol komandaları ilə yarışaraq, ardıcıl qələbələrlə uğur yolunu zirvəyə çatdırıb. Klub tarixində ilk dəfə olaraq Türkiyə Kubokunda çıxış edərək normal mövsümü 7-ci yerdə tamamlayıb və yarımfinal/play-off mərhələsində iştirak edərək mövsümü başa vurub. Artan uğurları ilə basketbol komandası 2024-2025-ci il mövsümündə ilk dəfə olaraq Türkiyəni Avropa yarışlarında – FIBA Basketbol Çempionlar Liqasında (BCL) təmsil edəcək.

Klubun U14 komandası 2023-2024-cü il mövsümündə İzmir çempionu və Türkiyə 3-cüsü olub, U16 komandası isə İzmir üzrə 2-ci yerə layiq görülüb. Basketbol gənclər liqasında (BGL) mübarizə aparan gənc komanda isə ötən mövsüm yarımfinala yüksəlmək uğurunu yaşayıb. “Aliağa Petkimspor” təkcə basketbol deyil, idmanın voleybol, futbol, velosiped, tennis və şahmat sahələrində də fərdi və komanda olaraq fəaliyyət göstərir.

Klubun qadın voleybol komandası da 1984-cü ildən etibarən şəhər və ölkə üzrə müxtəlif kateqoriyalarında keçirilən bütün yarışlarda iştirak edərək bir çox çempionluq qazanıb. 2023-cü ildən etibarən fəaliyyət sahəsinə daxil edilən şahmat bölməsində isə idman məktəbi şagirdləri yerli və regional turnirlərdə mühüm uğurlar əldə ediblər.

“Aliağa Petkimspor” gələcəyin idmançılarını yetişdirməyi hədəfləyir

“Aliağa Petkimspor” Aliağa bölgəsindəki gənclərin və böyüklərin idmanı həyat tərzinə çevirmələrini və bir vərdiş halına gətirmələrini hədəfləyir. Bununla yanaşı, yüksək səviyyədə idman bacarığı olan idmançıların milli, yerli və beynəlxalq arenalarda uğur qazanmasını təmin etmək üçün fəaliyyətlərini davam etdirir.

“Petkimspor” müxtəlif idman növlərində altyapı təlimlərini davam etdirərək 2023-2024-cü illərdə basketbol və voleybol bölmələrində 205 nəfərə pulsuz idman məktəbi imkanı təqdim edərək gənclərin sosial və peşəkar inkişafına töhfə verib. Klubun fəaliyyəti təkcə Aliağa ilə məhdudlaşmır. “Petkimspor” İzmirin Karşıyaka bölgəsində yerləşən Mavişehir Cihat Kora Anadolu liseyində idman məktəbi açaraq bütün İzmirdə fəaliyyətini genişləndirməyi planlaşdırır.

“SOCAR Türkiyə” – “İğdır” Futbol Klubunun forma sponsoru

“SOCAR Türkiyə” qardaş ölkədə həyata keçirdiyi iqtisadi layihələri sosial inkişafa və idmana verdiyi dəstəklə tamamlayır. Belə ki, “SOCAR Türkiyə” idmanın gələcəyinə töhfə vermək və sosial həmrəyliyi gücləndirmək məqsədilə əməkdaşlıqlarını davam etdirir. Ölkənin qərbindən şərqinə qədər futbolun enerjisini daşıyan “SOCAR Türkiyə” “İğdır” Futbol Klubunu dəstəkləməkdən qürur duyur. “İğdır” Futbol Klubu 2024-2025-ci il mövsümündə keçiriləcək bütün rəsmi oyunlarda formalarında SOCAR-ın loqosunu daşıyacaq.

Orxan Vahidoğlu, “İki sahil”