Yeni Azərbaycan Partiyası Nizami rayon təşkilatında partiyanın təsis olunmasının 32-ci ildönümünə həsr edilmiş tədbir keçirilib.

Tədbir iştirakçıları əvvəlcə Ümummilli Lider Heydər Əliyevin büstünü ziyarət edib, önünə gül dəstələri düzüb, xatirəsini ehtiramla yad ediblər.

Azərbaycan Respublikasının Dövlət Himninin səslənməsi ilə başlayan tədbirdə Ulu Öndər Heydər Əliyevin, eləcə də ölkəmizin ərazi bütövlüyü və suverenliyi uğrunda mübarizədə canlarını qurban vermiş şəhidlərimizin xatirəsi bir dəqiqəlik sükutla yad edilib.

Sonra “Yeni Azərbaycan Partiyası dünənin, bu günün və gələcəyin partiyasıdır” adlı videoçarx nümayiş olunub.

Çıxış edən Yeni Azərbaycan Partiyası Nizami rayon təşkilatının sədri Ramil Vəlibəyov, Nizami Rayon İcra Hakimiyyəti başçısının müavini Könül Həsənova, partiya veteranı Edilman Məmmədov, UNEC-in nəzdində Qida Sənayesi Kollecinin Tələbə Gənclər Təşkilatının sədri Ülvi Əzizov və başqaları bildiriblər ki, YAP son 30 ildə Cənubi Qafqazda qurulan ən böyük və nüfuzlu siyasi partiyadır. Vurğulanıb ki, Yeni Azərbaycan Partiyası Azərbaycan tarixinin son dərəcə ağır və keşməkeşli günlərində, ölkənin ciddi sınaqlara məruz qaldığı bir dövrdə təsis edilib. Həmin dövrdə Ulu Öndər Heydər Əliyevin rəhbərlik etdiyi Yeni Azərbaycan Partiyası qısa müddət ərzində cəmiyyətin aparıcı siyasi qüvvəsinə çevrilib və dahi şəxsiyyətin dediyi kimi “dünənin, bu günün və sabahın partiyası” səviyyəsinə yüksəlib.

Diqqətə çatdırılıb ki, bu gün Prezident İlham Əliyevin Sədrlik etdiyi Yeni Azərbaycan Partiyası Azərbaycanın siyasi təşkilatları içərisində istər kəmiyyətcə, istərsə də keyfiyyətcə bərabəri olmayan bir partiyadır.

Əlavə edilib ki, 2021-ci il 5 mart tarixində keçirilmiş YAP-ın VII Qurultayından sonra Azərbaycanın davamlı inkişafı və müasir dövrün çağırışları kontekstində mühüm vəzifələri reallaşdıran partiya inkişafının yeni dövrünü yaşamaqdadır.

Çıxışlardan sonra yubiley yaşında olan partiya veteranları və YAP Nizami rayon təşkilatının könüllülük layihəsinin bir qrup məzunu təltif olunub, partiyaya yeni üzv qəbul edilmiş şəxslərə vəsiqələr təqdim edilib.

Zamin Məmmədov, "İki sahil"