“Aston Martin” komandasının pilotu Lens Stroll Azərbaycan Qran-Prisi ərəfəsində Bakı trasından danışıb.

“İki sahil” xəbər verir ki, Bakı trasının xüsusiyyətləri ilə bağlı sualı cavablandıran pilot deyib: “Bu, ən çətin traslardan biridir, ona görə də yarış adətən maraqlı olur. Divarlara yaxınlaşanda səhvlərə yer qalmır, xüsusən də ikinci sektorda - bu, hazırkı mövsümdə Formula 1 dövrəsinin ən dar hissələrindən biridir.

Təhlükəsizlik avtomobilinin işə salınma ehtimalı çox yüksəkdir, siz istənilən vaxt strategiyanızı tənzimləməyə hazır olmalısınız və daha yüksək nəticə əldə etmək üçün hər bir fürsətdən istifadə etməlisiniz. Bu, həm də digər şəhər traslarından uzun, yüksək sürət tələb edən düz yolları ilə fərqlənir. Döngələrin sabitliyini və düz yollarda aşağı sürüklənmə arasında optimal birləşməni tapmaq vacibdir”.

Lens Stroll Azərbaycan Qran-Prisi yarışlarının hansı cəhətini bəyənməsi ilə bağlı sualı da cavablandırıb: “Marşrutun müxtəlifliyi və gözlənilməzliyi xoşuma gəlir. Siz orta sektorda çox dəqiq olmalı, divarları dolanaraq vaxt qazanmağa çalışmalı, sonra isə bolidi əsas düz yola çıxarmaq üçün onu ötüb keçə biləcəyiniz birinci döngəyə yerləşdirməlisiniz”.

Pilot 2017-ci ildə Bakıdakı Formula 1 yarışlarında ilk dəfə podiuma çıxması ilə bağlı xatirələrini də bölüşüb: “Bu, əslində, gözlənilməz bir yarış idi, bir neçə təhlükəsizlik avtomobili səfərləri və qırmızı bayraqlarla əla komanda işinin vacib olduğu bir mərhələ oldu. İkinci yeri tutmağıma az qalsa da, Formula 1 karyerama yeni başlayan bir pilot kimi podiuma çıxmağım məni məmnun etdi. Həmin anda sanki ətrafdakı hər şey duman içində idi, buna alışmaq üçün vaxt lazım idi”.