22 fevral 2024 20:07
723

Süleyman Ələsgərov-100: Qara Qarayevin ev muzeyində görkəmli bəstəkarın yubileyi qeyd edilib

Fevralın 22-də  görkəmli Azərbaycan bəstəkarı, dirijor, pedaqoq, ictimai xadim, Xalq artisti, professor, “Şöhrət” ordenli Süleyman Ələsgərovun 100 yaşı tamam olur.

“İki sahil” xəbər verir ki,  bu münasibətlə Azərbaycan Musiqi Mədəniyyəti Dövlət Muzeyinin filialı olan Qara Qarayevin ev muzeyində tədbir keçirilib.

Görkəmli bəstəkarın 100 illik yubileyinə həsr olunan tədbiri  giriş sözü ilə Azərbaycan Musiqi Mədəniyyəti Dövlət Muzeyinin direktoru, sənətşünaslıq doktoru, Əməkdar mədəniyyət işçisi Alla Bayramova açıb.

 Tədbirdə Qara Qarayevin qızı Züleyxa Qarayeva-Bağırova, muzeyin direktor müavini, Süleyman Ələsgərovun tələbəsi olmuş Təranə Zeynalova unudulmaz  musiqiçi ilə bağlı xatirələrini bölüşüblər.

Süleyman Ələsgərov adına 1 saylı Uşaq İncəsənət Məktəbinin Fortepiano ixtisası üzrə müəllimi Sevda Qurbanzadə təmsil etdiyi məktəbin adını şərəflə daşıdığı görkəmli bəstəkarın  həyat və yaradıcılıq yolu, onun musiqi mədəniyyətimizin inkişafında fəal iştirakı, maarifpərvər ziyalı kimi ictimaiyyət arasında hörmət və izzəti barədə söhbət açıb, pedaqoji fəaliyyəti haqqında məlumat verıb.

Tədbir Sevda Qurbanzadənin sinifinin şagirdlərinin ifalarında S.Ələsgərovun, Azərbaycan və dünya klassiklərinin əsərlərindən ibarət rəngarəng konsert proqramı ilə davam edib.

Musiqi ifaları Azərbaycan Musiqi Mədəniyyəti Dövlət Muzeyinin zəngin kolleksiyaları əsasında hazırlanmış slayd-şou ilə müşayiət olunub.