Müqəddəs Qarabağın erməni quldurlarından təmizlənməsi  uğrunda gedən  döyüşlərdə şəhidlik zirvəsinə ucalan  qəhrəman oğullarımızdan biri də 1983-cü ildə Lənkəran rayonu Veravul kəndində dünyaya göz açan gizir Yusif Məmmədrza oğlu Xəlilovdur.

Doğma Azərbaycana, xalqına böyük sevgisi olan Yusif  Xəlilov 18 il orduda xidmət edib. Vətənini göz bəbəyi kimi qoruyub, məqamı gələndə  onun yolunda canından keçməyi özünə şərəf bilib. 2016-cı ilin Aprel döyüşlərində iştirak edib, ağır yaralanıb. Sağaldıqdan  sonra tank komandiri kimi  Vətəninin keşiyində durub. Lokal antiterror tədbirlərnə qoşulan igid döyüşçü son damla qanına qədər vuruşaraq  əbədiyyətə qovuşub. Doğulub boya-başa çatdığı Veravul kəndində torpağa tapşırılıb.

Şərəfli ölümü ilə ölümsüzlüyə qovuşan Yusif Xəlilovun oxuduğu  Veravul kənd məktəbində   xatirə lövhəsi vurulub.  Məktəbdə  Yusif Xəlilov adına sinif otağı da fəaliyyət göstərir. Qəhrəman şəhidin Vətənə əmanət qoyduğu 2 qızı var.
Bəli, doğma Azərbaycanın müqəddəsliyinə tapınaraq ömrünü ona sərf edən Yusif kimi mərd oğlanlar heç zaman unudulmur.  

Zəfər Orucoğlu,
Azərbaycan Jurnalistlər Birliyinin üzvü