Venesuelanın xarici işlər naziri İvan Gil Pinto cümə axşamı Moskvada Rusiyanın xarici işlər naziri Sergey Lavrovla birgə mətbuat konfransında iştirak edib. Venesuela xarici işlər naziri bildirib ki, Rusiya və Venesuela əvvəlki neft hasilatını ikiqat artırmaq üçün danışıqlar aparacaq.
Venesuelanın xarici işlər naziri İvan Gil Pinto Sputnik-ə açıqlamasında Rusiya və Venesuelanın neft sektorunda əməkdaşlıq səylərini canlandırmaq və yüksəltməyə hazır olduqlarını açıqlayıb.
İki ölkə gündəlik neft hasilatının əvvəlki səviyyəsini bərpa etmək və sonradan onu iki dəfə artırmaq barədə razılığa gəliblər.
"Biz Venesuelanın PDVSA dövlət neft şirkətinin əldə etdiyi razılaşma çərçivəsində danışıqları və Rusiya şirkətlərinin birgə müəssisələrdə iştirakını bərpa etməyə razılaşdıq. Deyə bilərik ki, ilk mərhələdə səviyyəni bərpa etməyə çalışmışıq. Bir neçə il əvvəl əldə etdiyimiz hasilatın həcmini artırdıq. İkinci məqsəd isə bu hasilat səviyyəsini ən azı iki dəfə artırmaqdır”, - Venesuela xarici işlər naziri bildirib. O, neft hasilatının artırılması istiqamətində strateji addımı göstərən danışıqların və tərəfdaşlıqların bərpasının əhəmiyyətini vurğulayıb.
Qeyd edək ki, son illərdə Rusiya ilə Venesuelanın birgə neft hasilatı sutkada 120-150 min barrelə çatıb. Xarici işlər naziri əlavə edib ki, Venesuelanın “PDVSA” dövlət neft və təbii qaz şirkəti və Rusiyanın enerji nəhəngi “Qazprom” Venesuelada yeni qaz layihələrini müzakirə etmək üçün danışıqlar aparır.
"Qazprom artıq Venesuelada fəaliyyət göstərib və respublikaya qarşı sanksiyaların bu və ya digər şəkildə təsirinə məruz qalmış layihələr üzərində artıq işləyib. İndi biz əməkdaşlığın yeni mərhələsindəyik, ilk növbədə yeni qazın kəşfiyyatı və hasilatı ilə bağlı məsələləri müzakirə edəcəyik. Bu məsələlər yaxın həftələrdə həll olunacaq. “Qazprom” rəhbərliyi PDVSA-dan olan həmkarları ilə iştirak parametrlərini, texniki spesifikasiyaları hazırlamaq üçün görüşlər keçirir”, - Gil Pinto Sputnik-ə bildirib.
ABŞ-ın ölkəyə qarşı sanksiyalarının yumşaldılması ilə bağlı Venesuelanın xarici işlər naziri İvan Gil Pinto Sputnik-ə bildirib ki, bu, Moskva ilə Karakas arasında neft əməkdaşlığına heç bir şəkildə təsir etməyəcək.
"Rusiya və Venesuelanın ikitərəfli əməkdaşlığı var, bu, birbaşadır. Mümkün deyil ki, buna hansısa razılaşmalar təsir etsin. Biz Rusiya şirkətləri ilə işi davam etdiririk, onlar bir çox layihələrdə bizim etibarlı müttəfiqlərimizdir və biz bunu saxlamaq niyyətindəyik”, -deyə nazir vurğulayıb.
Xatırladaq ki, ölkə növbəti il ərzində gündəlik 1,76 milyon barrel hasilat səviyyəsinə nail olmaq niyyətindədir.
Nubar Süleymanova, “İki sahil”
