Ermənistanla Azərbaycan arasında sülh sazişinin imzalanmasına tərəfdar olmaq görüntüsü yaradan, müxtəlif masalarda danışıqlar aparmaqla « mən də varam» deyən məddah dövlətlərin Cənubi Qafqazla bağlı qərəzli maraqları aşkarlanır. Hazırlanan ssenarilər zamanına və baş verən hadisələrin axarına görə dəyişsə də, məqsəd eynidir: Bölgədə hegemonluğa nail olmaq! Dolaşıq kələfə bənzəyən sülh kabusundan ilanın ala çatıdan qorxduğu kimi çəkinən Ermənistanı istədikləri səmtə yönəldib, şoularının əsas rolunun ifaçısı baş nazir Nikol Paşinyandan istifadə edərək tula payı hesabına mənfur niyyətlərini həyata keçirməyə çalışan «müəlliflər» artıq kulisdən açıq səhnəyə çıxırlar. Son günlərdə Azərbaycanın ərazisi olan Laçın sərhəd-buraxılış məntəqəsindəki gərginliklər də həmin şouların iyrənc, eyni zamanda gülünc ssenarisidir.
…Ukrayna -Rusiya müharibəsi başlanan gündən Kremlə qarşı səlib müharibəsinə başlayan, Kiyevə yardımlar göstərən Qərb dairələri, Avropa dövlətləri siyasi masalarda danışıqlar təşkil edərək müxtəlif yollarla hərbi əməliyyatlara müdaxilə edirlər. Məqsəd əsrlərboyu özünü hegemon dövlət kimi tanıdan Rusiyanı zəiflətmək, dünyanın yeni düzənini formalaşdırmaqdır. İstəklərini reallaşdırmaq üçün əvvəllər hazırladıqları ssenariləri təkrar edənlər Azərbaycanı hədəf seçərək növbəti dəfə «Qarabağ düyünü»ndə ilişib qalıblar.
44 gün davam edən Vətən müharibəsindən sonra bölgədə sabitlik, Ermənistanla Azərbaycan arasında sülh yaratmaq üçün 10 noyabr 2020-ci ildə imzalanmış Bəyanata əsasən Rusiyanın sülhməramlı kontingenti müvəqqəti olaraq Azərbaycanın Qarabağ bölgəsində yerləşdirildi. Amma üzərinə düşən missiyanı nəzərdə tutulduğu istiqamətlər üzrə yerinə yetirməyən məramsız məramlılar əksinə əvvəlki ənənələr üzrə dəstəklədikləri Hayastana gözün üstə qaşın var demədikləri bir yana, onları mütəmadi silahlandırmaq təcrübələrini davam etdirirlər. Sərhəd bölgəsində yerləşən Azərbaycanın hərbi mövqelərini davamlı atəşə məruz qoyan separatçı rejimin terrorçularının təxribatlarını «görməyən qırmızı ulduzlu paqonlular» lazım gəldikdə qeyri-qanuni silahların Xankəndiyə daşınmasına , Azərbaycanın təbii sərvətlərinin istismarına yardım da göstərirlər. «Vətəndaş cəmiyyətinin nümayəndələri rus sülhməramlılarından xahiş etdilər ki, mədənlərdə nəyin baş verdiyini görmək üçün orada monitorinq keçirsinlər. Biz gördük ki, dəmir və qızıl filizi yük maşınlarında rus sülhməramlılarının müşayiəti ilə Qarabağdan Ermənistana daşınır. Xalqımıza məxsus təbii sərvətlərimizin qanunsuz istismarına etiraz edən Azərbaycanın qızıl, mis mədənlərində monitorinqlərin keçirilməsinə icazə verməməklə də Ermənistana dəstəyini davam etdirən həmin missiyalılar təbii sərvətlərimizin qanunsuz daşınmasına dəstək göstərirdilər. Həmin yerə getmək hüququmuz təmin edilmədi və beləcə vətəndaş cəmiyyətimizin nümayəndələri yola nəzarət etməyə başladılar. Amma yol yenə də bağlı deyildi, hərəkət azad idi» söyləyən Prezident İlham Əliyev Xankəndidə yaşayan erməni əsilli Azərbaycan vətəndaşlarının, xüsusilə müalicəyə ehtiyacı olanların tələbatlarının daim ödənildiyini diqqətə çatdırır. Beynəlxalq Qızmızı Xaç Komitəsinin emblemi altında separatçılar üçün qacaq mal daşınması kimi suverenliyimizə hörmətsizlik olan əməllər təbii ki, Azərbaycan xalqının narazılığına səbəb oldu. Laçın buraxılış- sərhəd məntəqəsində Rusiya sülhməramlılarının gözləri qarşısında Azərbaycan bayrağına qarşı təxribat törədən separatçıların bir əsgərimizi yaralaması isə müstəqilliyimizə hörmətsizlik idi. Bu səbəbdən müvəqqəti bağlanan Laçın sərhəd-buraxılış məntəqəsində hərəkət sonradan bərpa edildi. Növbəti təxribat isə maşınlarının üzərində , uniformalı sürücülərinin geyimində Qırmızı Xaçın emblemi olan müəmmalı yük karvanının separatçılara qeyri-qanuni daşımaları oldu. «Beləliklə, yol yenidən bu şəkildə bağlanıldı və biz Qırmızı Xaç Komitəsindən buna son qoyulmasını və bizimlə daha konstruktiv işləməsini xahiş etdik. Çünki əfsuslar olsun ki, bu günə kimi onların Qarabağdakı ofisi Bakı ofisinə yox, İrəvandakı ofisə tabedir. Bu da yolverilməzdir» söyləyən Prezident İlham Əliyev Laçın sərhəd-keçid məntəqəsi ətrafında yaranan gərginliyin əsas səbəbkarının Ermənistanın xunta rejiminin olduğunu açıqlayır. Bütün dünyanın, Ermənistanın baş naziri Nikol Paşinyanın «Qarabağ Azərbaycandır!» söyləməsinə baxmayaraq, son günlərdə bu yolda yaranan vəziyyət üçün Azərbaycanı günahlandıranların bəhanələri əsassızdır. Halbuki, Qırmızı Xaç Komitəsinin Xankəndidəki ofisinin Bakıdakı quruma tabe olması tələbi Azərbaycanın legitim hüququdur.
Artıq bütün dünya ictimaiyyəti dəqiq bilir ki, Xankəndidə bilərəkdən yaradılan «humanitar böhran» siyasi oyununda da Rusiyaya rəqib dairələrin əli vardır. Bir neçə gündür ki, Ermənistandan gələn, Laçın sərhəd- buraxılış məntəqəsindən Xankəndiyə keçmək istəyən yük maşınlarını müşayət edən Avropa İttifaqının (Aİ) təmsilçilərinin yəqin ki, Brüsseldə keçirilən görüşlərdən xəbəri vardır. Artıq altı dəfə baş tutan danışıqlarda dəfələrlə bildirilib ki, Qarabağ Azərbaycanın toxunulmaz ərazisidir. Belə halda rəsmi Bakının icazəsi olmadan Aİ nümayəndələrini və gözətçilik etdikləri «humanitar maşın karvanlarını» ərazimizə buraxmaması beynəlxalq hüquq normalarına tam uyğundur. Prezident İlham Əliyevin bu qətiyyəti həm də əzəli, əbədi rəqiblərimizə daha bir mesajdır: «Heç bir qüvvə Azərbaycanın ərazisinə icazəsiz daxil ola, suverenliyimizə xələl gətirə bilməz.»
«Müharibədə qalib gəlmək mənim həyatımın, siyasi həyatımın missiyası idi» söyləyən Prezident İlham Əliyevin qətiyyətinə bütün dünya şahidlik edir. Hələ də içərisində hansı yüklərin olduğu bilinməyən, erməni ekspertlərinin açıqlamalarına istinad edilsə bəlkə də boş maşınların Laçın sərhəd- keçid məntəqəsində gün sayması dövlət başçımızın siyasi iradəsinin nəticəsidir. Ermənistana qarşı hər hansı bir ərazi iddiası olmayan Azərbaycan ölkəmizin suverenliyinə qarşı cəhdlərin qarşısının qətiyyətlə alınacağını da bildirir. Ukraynaya kömək naminə birləşən, Gürcüstanın separatçı regionları ilə bağlı etirazlarını bildirən Avropanın eyni mənşədən qaynaqlanan «Xankəndi oyunu»na, separatizmə, terrora dəstəyi, Azərbaycana qeyri- səmimi münasibətin, ikili standartların hələ də sülhə təhdid olmasının danılmaz ifadəsidir.
Bu günlərdə «Euronews» televiziyasına müsahibəsində «Nə üçün İspaniya Kataloniyaya referendum keçirməyə icazə vermir, baxmayaraq ki, onların sayı 5, yaxud 6 milyon nəfərdir və yaxınlıqda öz dövləti olan ermənilərdən fərqli olaraq, onların öz dövləti yoxdur. Nə üçün biz separatizmə dözməliyik? Biz bunu etməyəcəyik» söyləyən Prezident İlham Əliyev separatçıları dəstəkləyən dairələri haqqa, ədalətə dəvət edir. 1988-ci illərdə etnik təmizləmə aparan Ermənistanın vəhşiliklərinin qurbanlarını yada salan dövlət başçımız o hadisələrdə doğma torpaqlarından didərgin salınan Qərbi Azərbaycandan zorla çıxarılan, deportasiyaya məruz qalan soydaşlarımızın ata yurdlarına qayıtmaq hüquqlarının olduğunu da xatırladır.
Ermənistan beynəlxalq ictimaiyyətin sülh təşəbbüslərini düzgün dəyərləndirməlidir. Əgər onlar Azərbaycanla sülh sazişi imzalamasalar gələcəkdə daha acınacaqlı vəziyyətlə üzləşməli olacaqlar. Erməni icmasına dəfələrlə bildirilib ki, onlara görə Azərbaycana qarşı heç kim döyüşməyəcək. «Qarabağ erməniləri başa düşməlidirlər ki, təhlükəsizlik təminatları, hüquqlarının, o cümlədən təhsil, mədəniyyət, dini, bələdiyyə hüquqlarının təmin edilməsi ilə Azərbaycan cəmiyyətinin bir hissəsi olaraq onlar normal həyat yaşayacaqlar. Onlar manipulyasiyanın girovu olmağa son qoyacaqlar» sözləri ilə Xankəndi ermənilərinə müraciət edən Prezident İlham Əliyevin vurğuladığı kimi, bu gün yaşadıqları vəziyyət onların xeyrinə dəyişməyəcək. Beynəlxalq hüququ ayrılıqda tətbiq etmək istəyən ölkələr yalnız öz nüfuzunu itirəcəklər.
Son günlərdə qatı terrorçu, Meşəlidə soydaşlarımıza qarşı amansız rəftar edən 25 nəfər kənd sakinini qətlə yetirən, illərdən bəri Xankəndidə gizlənən Vaqif Çerkezoviç Xaçaturyanın sərhəd dəstəsinin hərbçiləri tərəfindən həbs edilməsi Azərbaycanın terrora qarşı davamlı mübarizəsinin ifadəsidir. İllərdən bəri törətdikləri qətliamlardan gizlənərək cəzadan kənarda qaldıqlarını zənn edən erməni cəlladları unutmasınlar ki, onları da eyni aqibət gözləyir. Bu hadisənin qanunsuz yük maşınlarını müşayiət edən Avropa İttifaqının təmsilçilərinin də izləməsi o deməkdir ki, ölkəmizə qarşı təhdidlər, təzyiqlər qüdrətli Azərbaycanın qətiyyətli lideri İlham Əliyevin dəyişilməz qətiyyəti qarsısında gücsüz, ölkəmiz əleyhinə qəbul olunan bəyanatlar kağız parçasıdır.
Artıq bir neçə gündür ki, Xankəndi erməniləri tərəfindən Bakıya gəlmək üçün xeyli müraciətlər daxil olub. Hərbi cinayətlərdə iştirak etməyənlər Prezident İlham Əliyevin çağırışlarını razılıqla qarşılayaraq Milli Konstitusiyamıza uyğun Azərbaycan vətəndaşlığını qəbul etmək istədiklərini bildirirlər. Necə deyərlər, haqq nazilər, üzülməz. Azərbaycan öz istədiklərinə nail olacaq, Xankəndidə separatçı tör-töküntülərinin, Ermənistanın terrorçularının kökü kəsiləcək.
Xuraman İsmayılqızı, "İki sahil"
