“TotalEnergies SE” Namibiya dənizindəki  “Venera” qiymətləndirmə  quyusunda  yüngül neft kəşfini sınaqdan keçirməyə davam edir . Şirkətin  baş icraçı direktoru Patrick Pouyanné qiymətləndirmə quyusunun qazıldığını təsdiqləyib və Pouyanné iyulun 27-də  verdiyi məlumatda quyuda  böyük neft sütununun  olduğunu söyləyib.

“Venera”nın qiymətləndirmə quyusu Namibiyanın cənub sahillərindən təxminən 290 km uzaqlıqda,  suyun təxminən 3000 metr dərinliyində qazılıb. Daha əvvəl  ərazidə qazılan “Venera-1X” kəşfiyyat quyusu “Maersk Voyager” qazma gəmisi vasitəsi ilə  suyun  ümumi 6296 metr dərinliyində  qazılmış və Aşağı Təbaşir dövrünə aid yüksək keyfiyyətli yüngül neftli qumdaşı layı ilə qarşılaşmışdır. İlk sınaq avqustun əvvəlində başlayacaq və nəticələr sentyabr ayında  bəlli olacaq. 

Qeyd edək ki, hər iki quyu “Orange” hövzəsini hədəfə alıb.

Cənubi Afrika ilə sərhəddə yerləşən  “Orange” hövzəsində əməliyyatları genişləndirməyi nəzərdə tutan şirkətin  direktoru Pouyanné şirkətinin hazırkı diqqətinin  neftin bol olduğu Namibiyaya yönəldiyini bildirib.

Leyla Şıxəli, “İki sahil”