«Dünya beşdən ibarət deyil» müdrik kəlamı ilə beynəlxalq aləmdə böyük nüfuz sahibi olan Prezident Rəcəb Tayyib Ərdoğan seçkidə qazandığı qələbəsini ona etimad göstərən xalqının birlik və həmrəylik nümunəsi kimi dəyərləndirir
Qaynar dünya siyasətinin hərarətli günlərindən olan 28 may 2023-cü il bütün türk dünyası üçün birlik, həmrəylik bayramı kimi tarixə çevrildi. Həmin gün Türkiyədə ikinci turu keçirilən prezident seçkilərini öz maraqlarına uyğun izləyən bəzi dövlətlər türk xalqından daha həyəcanlı idilər. Dünyanın düzənini səhmana salacaq siyasətin kimlər tərəfindən idarə ediləcəyi iddiasında olanların eyniləşən, bəzən ziddiyət təşkil edən ehtimalları seçki qutusundan çıxan nəticələrlə bəlli oldu. Türk xalqı bu dəfə də tarixin sınağından alnı açıq çıxdı. Qazanan ədalət, xalqın sarsılmaz iradəsi, milyonların qətiyyəti oldu. Prezident seçkiləri ərəfəsində ölkədə keçirilən sorğularda bəzi qüvvələrin Türkiyəni parçalamaq planlarına qarşı birlik həmrəylik göstərəcəklərini bildirən seçicilər Vətənini, övladlarının gələcəyini etibar edəcəkləri namizədin adını tərəddüd etmədən söyləyirdilər: Rəcəb Tayyib Ərdoğan!
İqtisadi inkişafı, diplomatik uğurları, hərbi qüdrəti ilə dünyada söz sahibi olduğunu zənn edən dövlətlərin önündə gedən Türkiyə 28 mayda demokratiya pərdəsi altında gizlənən beynəlxalq təşkilatlara belə demokratiyanın ustad dərsini keçdi. Özlərini «Millət İttifaqı» adlandırsalar da milli maraqları deyil, başqalarının istəklərini yerinə yetirəcəklərini seçkilərə hazırlığın ilk mərhələsində keçirdikləri görüşlərdə səsləndirdikləri xain, terrora dəstək çağırışları ilə bəlli edənlərə yerini göstərən milyonlar heç bir ölkədə görünməyən şəffaf səsvermədə yekdil iştirakları ilə Vətənlərini mənfur niyyətlərdən qorudular. Xalqın namizədi, milyonların etimad göstərdikləri Rəcəb Tayyib Ərdoğan bütün xain çağırışlara qalib gəldi. Türkiyə ilə Azərbaycan arasında əsrlərdən bəri davam edən qardaşlığa kölgə salmağa çalışan bədniyyətlilər bilməli idilər ki, dırnağı ətdən ayırmaq mümkün deyil! Hər iki xalqın istəklərinə uyğun siyasi, iqtisadi əlaqələrə kölgə salacaq, həyata keçirilən qlobal layihələrin istiqamətini dəyişəcək qüvvə yoxdur və ola da bilməz. Türk dünyasının öndərləri Mustafa Kamal Atatürkün və Heydər Əliyevin təməlini qoyduqları bu qardaşlıq əbədi və sarsılmazdır. Dünya siyasətində çəkisi və nüfuzu artan Türkiyə ilə Azərbaycan daim qoşa addımlamışlar və eyni həmrəylik bundan sonra da əzmlə davam etdiriləcək.
28 mayda ölkəyə başçılıq etdiyi son iyirmi ildə xalqına sədaqətlə xidmət edən Rəcəb Tayyib Ərdoğanın uğurlarından, xalqın liderinə etimadından qorxanların, 2023–2028-ci illərdə bu ölkənin daha da qüdrətlənəcəyindən təşvişə düşənlərin niyyətləri Qara dənizin sularında boğuldu.
Bir vaxtlar Türkiyəni Avropa İttifaqına qəbul etməmək üçün bəhanələr uyduranların, bu ölkəni 1960–1990-cı illərdəki kimi zəif görmək istəyənlərin doğrulmayan ümidləri səbəbsiz deyildi. Akkuyuda tam gücü ilə işləyəcək Atom Elektrik Stansiyası, Cənub-Şərqi Anadoluda neft ehtiyatlarının aşkar edilərək istifadəyə hazır vəziyyətə gətirilməsi Qərbi narahat edir. Bu ölkənin müdafiə qüdrətini artıran modern hücum təyyarələrinin, hərbi gəmilərin ölkənin Silahlı Qüvvələrinə verilməsi, zəlzələ bölgəsində qısa müddətdə aparılan genişmiqyaslı tikinti işlərinin sürətli davamı təsadüfi dövlət başçılarının öhdəsindən gələ biləcəkləri vəzifə deyildi. Yüzilliyin kəsişməsində seçim qarşısında qalan xalq inanırdı ki, taleyini etibar edəcəyi, biri-birindən məsuliyyətli, siyasi, iradə qətiyyət tələb edən tarixi missiyanı Vətənini sevən Rəcəb Tayyib Ərdoğan kimi təcrübəli siyasətçi, dövlət xadimi davam etdirə bilər.
Bu ilin aprel ayında İstanbulda keçirilən «TEKNOFEST» festivalındakı çıxışında qardaş ölkənin hərbi qüdrətini «Kızılelma»” havada, «Altay»” və «Togg»” quruda, «Anadolu”» dənizdə» kəlmələri ilə ifadə edən, iki qardaş ölkənin sarsılmaz birliyini « Atam demişkən, «Bir millət, iki dövlət”, əlavə də etmək istəyirəm, «Bir yumruq!”.» sözləri ilə diqqətə çatdıran Prezident İlham Əliyevin sözləri qardaş ölkənin qüdrətinin ifadəsi, Azərbaycanla Türkiyənin həmrəylik nümunəsi idi.
Ölkədəki iqtisadi problemlərin aradan qaldırılması üçün daxili resurslardan, xalqın gücündən istifadə etməklə Türkiyənin regionda və dünyada liderliyini təsdiqləyəcək ən layiqli liderin Rəcəb Tayyib Ərdoğanın siyasi iradəsinə inanan xalq qarşıdakı illərdə seçimində yanılmadığının şahidi olacaq. Bu ölkənin Şərqi Aralıq dənizində söz sahibi olması, ölkə ərazisində yüksək sürətli dəmir yollarının ardıcıl istifadəyə verilməsi, Yeni İstanbul Kanalı layihəsinin reallaşdırılması, ən iri hava limanlarının, səhiyyə müəssisələrinin istifadəyə verilməsi bu ölkənin xarici düşmənləri kimi, daxili xəyanətkarlarını da məyus edir. Onlar Türkiyəyə dəmir iradəli liderin yox, hər cür güzəştə açıq olan zəif birisinin başçılıq etməsini istəyərdilər.
Amma zamanın hökmü, günümüzün reallıqları ədalətli seçimində yanılmadı. Bütün dünyanın diqqətini cəlb edən dünya siyasətinin masasında həllini gözləyən məsələlərlə bağlı müzakirələrdə nüfuzu, dövlətçilik təcrübəsi ilə seçilən Rəcəb Tayyib Ərdoğanın vasitəçiliyi ilə yaranan sabitlik hər kəsin maraqla izlədiyi hadisələrdir. Dünyada taxıl qıtlığının yarandığı məqamlarda ədalətli davranışı ilə maraqları birləşdirən , Rusiya–Ukrayna müharibəsində vasitəçi olan, hər iki ölkə ilə danışıq aparmaq səlahiyyətlərinə malik Türkiyə Prezidentinin beynəlxalq səviyyədə artan nüfuzu bölgədə qarşılıqlı anlaşma prinsipinə sadiqliyin yeganə yol olduğunu göstərdi. Qlobal məsələlərin müzakirələrində, mühüm əhəmiyyətli layihələrin reallaşmasında maraqları eyni olan, qoşa addımlayan Türkiyə ilə Azərbaycanın dünya siyasətinə təsir imkanlarının artması da təkzibolunmaz reallıqdır.
Türk xalqının daim «Can Azərbaycan!» adlandırdığı ölkəmizlə sarsılmaz qardaşlığı qlobal enerji, nəqliyyat layihələrinin reallaşmasında təsdiqləndiyi kimi, 44 gün davam edən İkinci Qarabağ müharibəsində də özünü doğrultdu. Ulu Öndər Heydər Əliyevin «Azərbaycan ilə Türkiyə bir millət, iki dövlət» kəlamının müdrikliyi Vətən müharibəsində , bu ilin fevralında qardaş ölkədə baş verən, əsrin fəlakəti adlandırılan dəhşətli zəlzələnin nəticələrinin aradan qaldırılmasında da təsdiqləndi. İkinci Qarabağ müharibəsindən sonra paytaxtımızda keçirilən Zəfər paradında qoşa dayanan, Şuşada Müttəfiqlik Bəyannaməsini imzalamaqla iki ölkə arasındakı qardaşlığın əbədiliyini dünyaya bəyan edən dövlət başçıları İlham Əliyevin və Rəcəb Tayyib Ərdoğanın Zəngəzur dəhlizinin açılması ilə bağlı göstərdikləri qətiyyət də türk dünyasının artan gücünün ifadəsidir.
İyunun 3-də Ankarada Türkiyə Respublikasının Prezidenti Rəcəb Tayyib Ərdoğanın səlahiyyətlərinin icrasına başlaması mərasimində bir daha təsdiqlənən bu səmimiyyəti bütün dünya ictimaiyyəti maraqla izlədi. Canlı yayımlanan mərasimdəki görüntülər Prezident İlham Əliyevin «Bu gün dünya xəritəsinə baxsaq, görərik ki, bizim qədər bir-birinə bağlı olan, bir-birinin hər zaman yanında olan ikinci ölkələr yoxdur. Bizi birləşdirən həm ortaq tarix, din, mədəniyyət, dil, ədəbiyyat, eyni zamanda bizim siyasətimizdir. Türkiyə və Azərbaycan dünya miqyasında müstəqil siyasət yürüdən ölkələrdir. Türkiyənin gücü bizim gücümüzü artırır» sözlərini daha geniş səviyyədə bəyan etdi.
Türkiyə Cümhuriyyətinin yaradılmasının 100-cü ildönümündə, daha güclü həmrəyliyə ehtiyac duyulduğu dünyamızda iki qardaş xalqın sarsılmazlığının ifadəsi olan bu səmimiyyətə şahidlik edən qonaqlar, dövlət başçıları, beynəlxalq təşkilatların nümayəndələri həqiqi səmimiyyətin nəyə qadir olduğunu hiss etdilər. Türkiyə yüzilliyi”nin başladığını və ölkənin daha möhtəşəm yüksəlişə qədəm qoyduğunu vurğulayan Prezident Rəcəb Tayyib Ərdoğanın «Gün bir olmaq, bərabər olmaq, min illik qardaşlığımızı daha da möhkəmləndirmək günüdür. Gün övladlarımızın aydın sabahlarına sahib çıxmaq günüdür... Birlikdə «Türkiyə yüzilliyi»”nin inşası üçün çiyin-çiyinə çalışmalıyıq”» sözləri başda Azərbaycan olmaqla türk dünyasını birlik və həmrəyliyə çağırış idi. Rəcəb Tayyib Ərdoğan növbəti beş il ərzində Türkiyə Respublikasının şanını və şərəfini qorumaq, etibarını artırmaq və adını dünyada daha da ucaltmaq üçün bu birliyə arxalanır, qardaş dəstəyinə güvənir.
Bu güvənin ən bariz ifadəsi bu ilin aprel ayında İstanbulda keçirilən «TEXNOFEST» festivalında Prezident Rəcəb Tayyib Ərdoğanın azərbaycanlı həmkarı İlham Əliyevə ünvanladığı: «Əziz qardaşım İlham Əliyev lap əvvəldən mərkəzi Pazarcık olan zəlzələdə bizi heç vaxt yalnız qoymadı. İlk andan etibarən axtarış-xilasetmə heyətləri Kahramanmaraşda bizimlə birlikdə oldu. Onunla da kifayətlənmədi, daha sonra İlham qardaşım Kahramanmaraşda min evin inşa ediləcəyinə söz verdi. Təbii ki, orada məktəbi, məscidi, yataqxanası və yaşayış binaları olan bir Azərbaycan şəhəri inşa etməyi qərara aldı. Bu gün fürsətdən istifadə edərək, indi onun təməlini qoyacağıq» minnətdarlıq sözləridir. Vətən müharibəsinin ilk saatlarından Türkiyənin siyasi, mənəvi dəstəyini hiss edən Azərbaycan xalqının, zəlzələnin nəticələrinin aradan qaldırılmasında türkiyəli həmkarları ilə birlikdə çalışan azərbaycanlı mütəxəssislərin dəstəyi hər iki xalqı qürurlandıran birlik nümunəsidir.
Xuraman İsmayılqızı, «İki sahil»
