Bugünkü reallıqlarımız: Güclü iqtisadiyyat, müzəffər ordu, beynəlxalq nüfuz
İrəvan Bakıdan gələn sülh çağırışlarına müsbət cavab verməlidir
Prezident İlham Əliyevin son 20 ildə ölkəmizə qazandırdığı ən böyük uğurlardan biri də bu gün Azərbaycanın müasir beynəlxalq münasibətlər sistemində müstəqil siyasət həyata keçirən güclü və nüfuzlu dövlət, həmçinin etibarlı tərəfdaş kimi tanınmasıdır. Bu gün Prezident İlham Əliyevin düşünülmüş, tam müstəqil siyasəti və uğurlu diplomatiyası ilə Azərbaycan sosial-iqtisadi inkişafda böyük nailiyyətlərə, beynəlxalq aləmdə yüksək nüfuza malik olan dövlət statusuna sahiblənib. Hazırda Azərbaycan tərəqqi və inkişaf yolu ilə inamla irəliləyir, regional və beynəlxalq proseslərdə mühüm rol oynayır. Tarixinin ən güclü dövrünü yaşayan Azərbaycanın bugünkü reallıqları və uğurları güclü iqtisadiyyat, qüdrətli dövlət, müzəffər ordu, beynəlxalq arenada önəmli mövqe , uğurlu xarici siyasət və qalib ölkə statusuna sahiblənməsidir.
Prezident İlham Əliyevin rəhbərliyi ilə həyata keçirilən strateji kurs qarşılıqlı faydalı münasibətlərin hərtərəfli inkişafına öz möhkəm sadiqliyini nümayiş etdirməkdədir. Bu kurs ölkəmizin çiçəklənməsi, davamlı tərəqqiyə və əhalinin rifahının təmin edilməsinə, Azərbaycan dövlətçiliyini müntəzəm şəkildə möhkəmləndirib inkişaf etdirməyə və milli mənafeləri qorumağa yönəldilmişdir. Bölgədə əmin-amanlığın və sabitliyin bərqərar edilməsi, nəhəng nəqliyyat və əməkdaşlıq layihələrinin gerçəkləşdirilməsi kimi strateji məqsədlərə nail olmaq Azərbaycanın xarici siyasətinin əsas prioritetlərindən birini təşkil edir. Qloballaşan dünyada Azərbaycan xalqının maraqlarının daha səmərəli müdafiəsi naminə ölkə iqtisadiyyatının inkişafı üçün müxtəlif layihələrə xarici sərmayələrin cəlb edilməsi də Azərbaycanın xarici siyasəti üçün müstəsna əhəmiyyət daşımaqdadır.
Son 20 ildə dayanıqlı və özünü təmin edən müstəqil iqtisadiyyatı, xarici siyasəti olan Azərbaycan İkinci Qarabağ müharibəsindəki şanlı Zəfəri ilə gücünə bir qədər də güc qatdı. Dünya Azərbaycanı həm də müzəffər orduya sahib ölkə kimi tanıdı.Siyasi, iqtisadi və hərbi gücün vəhdəti Azərbaycanın söz və güc sahibi kimi nüfuzunu yüksəltdi. Bu gün elə bir mötəbər beynəlxalq toplantı yoxdur ki, Azərbaycan Prezidenti oraya dəvət edilməsin və həmin tədbirdə müasir dövrün çağırışları, mövcud problemlərin həlli yolları barədə fikirlər səsləndirməsin. Yəni, Prezident İlham Əliyev təkcə regional məsələlərdə deyil, eyni zamanda, mahiyyətindən asılı olmayaraq dünya miqyasında baş verən qlobal hadisələr zamanı qətiyyətli mövqe nümayiş etdirir. Dövlət başçısının təşəbbüsləri qlobal miqyasda beynəlxalq həmrəyliyin və əməkdaşlığın möhkəmləndirilməsi istiqamətində mühüm nümunədir. Buna tək bir misal olaraq Prezident İlham Əliyevin Qoşulmamaları Hərəkatının sədri kimi irəli sürdüyü qlobal təşəbbüsləri , mühüm təklifləri göstərmək olar. Ölkəmizin təşkilata sədrliyinin qlobal pandemiyaya dövrünə təsadüf etməsinə baxmayaraq, çevik və səmərəli şəkildə öz sədrlik gündəliyini yeni reallığa uyğunlaşdıran cənab İlham Əliyev təşəbbüskarlığı, qətiyyəti və siyasi iradəsi ilə ortaya nümunə qoydu.
Tarixi Zəfərimizin qazanılmasından ötən illər ərzində Azərbaycan danışıqlar masasında da böyük üstünlük qazandı. Bu gün Ermənistan Azərbaycanın ərazi bütövlüyünü tanıyır, Qarabağın Azərbaycan torpağı olduğunu təsdiqləyir. Bu, qətiyyətli və dönməz mövqenin yaratdığı mənzərədir. Dövlət başçısı Laçın sakinləri ilə görüşündə də bildirdi ki, bütün bu reallıqları yaradan biz olmuşuq: "Məhz bunun nəticəsində İkinci Qarabağ müharibəsinin başa çatmasından sonra həm Azərbaycan-Ermənistan sərhədində, həm Rusiya sülhməramlı qüvvələrinin nəzarətində olan ərazilərdə, həm sərhəd-buraxılış məntəqəsini qoymaqla biz yeni reallıq yaratdıq və Ermənistanı məcbur etdik ki, bizim dediyimizi onlar da təkrarlasın. Mən bunu İkinci Qarabağ müharibəsi başa çatandan sonra demişdim, Azərbaycanla Ermənistan arasında sülh müqaviləsi o halda mümkündür ki, onlar deyəcəklər: Qarabağ Azərbaycandır! Onlar cəmi 3-4 il bundan əvvəl “Qarabağ Ermənistandır” deyirdilər və hesab edirdilər ki, bizim torpaqlarımızı əbədi işğal altında saxlaya bilərlər. Hesab edirdilər ki, biz azərbaycanlılar bu vəziyyətlə barışacağıq. Mən isə deyirdim ki, yox, barışmayacağıq. Onlara da, onların havadarlarına da, onlara bu gün dəstək verənlərə də o vaxt deyirdim ki, biz heç vaxt barışmayacağıq. Həyat bir daha onu göstərdi ki, nə deyiriksə, onu da edirik. Bir neçə gün bundan əvvəl Ermənistan rəhbərliyi tərəfindən verilən açıqlama faktiki olaraq mənim bir neçə il bundan əvvəl dediyim “Qarabağ Azərbaycandır!” sözlərimin təkrarıdır".
Bu gün Cənubi Qafqazda sülhün təmin olunması, Azərbaycanla Ermənistan arasında münasibətlərin normallaşdırılması xüsusi diqqət mərkəzindədir. Azərbaycan bu istiqamətdə fəal siyasət həyata keçirir, Ermənistan isə gah nala vurur, gah da … Torpaqlarımızın işğaldan azad edilməsindən ötən müddət ərzində Azərbaycanla Hayastan arasında münasibətlərin normallaşması ilə bağlı bir neçə platformada müzakirələr aparılıb. Ən əsası odur ki, Moskvada , Soçidə, Praqada və Brüsseldə aparılan danışıqlarda Azərbaycan daim sülhə tərəfdar olduğunu göstərib, münasibətlərin normallaşması istiqamətində konstruktiv təkliflər ortaya qoyub. Lakin istər Avropa İttifaqı Şurasının Prezidenti Şarl Mişelin, istərsə də Rusiya Prezidenti Vladimir Putinin vasitəçiliyi ilə aparılan müzakirələrdə müəyyən razılaşmalar əldə olunsa da, Hayastan davamlı şəkildə imzaladığı bəyanatların, üzərinə götürdüyü öhdəliklərin ruhuna və məzmununa uyğun olmayan davranış ortaya qoyub.
Bu ilin may ayından etibarən Azərbaycan ilə Ermənistan arasında münasibətlərin normallaşması istiqamətində danışıqlar xüsusilə intensivləşib. Ard-arda baş tutan təmaslar, Vaşinqtonda XİN rəhbərlərinin, Brüsseldə və Moskvada dövlət rəhbərlərinin görüşləri, mövqelərin yaxınlaşdırılması üçün mühüm şanslar yaradır. Kişineuda keçirilən görüş də qeyri-rəsmi olsa belə, hər halda gələcək müzakirələr üçün müəyyən rol oynaya bilər. Görüşdən sonra verilən açıqlamalar da bununla bağlı ümidlər yaradır. Vurğulanmalıdır ki, son görüşlərin ardından Ermənistanın siyasi rəhbərliyinin bəzi bəyanatları sülh ilə bağlı da müəyyən ümidlər formalaşdırır. Bununla belə, erməni məkri birmənalı şəkildə reallıqları və ədaləti özündə əks etdirən sülhün imzalanmasını hələ də gecikdirir. Erməni mediası zaman-zaman xəritələr, delimitasiya ilə bağlı manipulyasiyalara yol verir, daxili auditoriyaya hesablanan qeyri-real fikirlər tirajlayır, təxribatlar törədir. Amma reallıq dəyişmir - sülh prosesi Azərbaycanın irəli sürdüyü ədalətli və beynəlxalq hüquqa əsaslanan şərtlər əsasında inkişaf edir.
Rəsmi İrəvan nə qədər çalışsa da başqa yolu yoxdur - İkinci Qarabağ müharibəsi regiondakı siyasi vəziyyəti köklü şəkildə dəyişib. Artıq Laçın-Xankəndi yolundakı sərhəd buraxılış məntəqəsi bütün reallıqları hər kəsə nümayiş etdirib. Ordusu darmadağın edilmiş, iqtisadiyyatı çökdürülmüş, əhalisi ac-yalavac vəziyyətdə olan Ermənistanın da sülh sənədini imzalamaqdan başqa bir yolu yoxdur. Ona görə də nə qədər ki, İrəvan üçün gec deyil Bakıdan gələn sülh çağırışlarına müsbət cavab verməlidir.
Yaqut Ağaşahqızı, “İki sahil”
