Fransanın, İranın  himayədarlıq etdiyi  Ermənistan hələ də  təxribatçı niyyətlərindən əl çəkmir.  Avropa Parlamentinin  Azərbaycana qarşı qəbul etdiyi ədalətsiz, əsassız  qətnamədən sonra anti-Azərbaycan qruplaşmanın qızışdırıcı dəstəyinə  arxalanan Hayastan  riyakar təxribatları ilə  Azərbaycanla  Ermənistan arasında  daimi sülhün imzalanmasına əngəl törədir. Fransa deputatlarının çoxluq təşkil etdiyi, Prezident İlham Əliyevin vurğuladığı kimi, riyakar, yalançı, üzdə bir söz deyib arxada məkrli siyasət yeridən  ermənipərəst təşkilatların dəstəyindən azğınlaşan separatçılar dəmir yumruğun zərbəsini yenidən görmək istəyirlər.

Prezident İlham Əliyevin «Yəni, bu iki il yarım müddət ərzində bütün dünya bir daha hər şeyi gördü. Eyni zamanda, anti-Azərbaycan qüvvələr bizim əyilməz iradəmizi gördü. Heç kim bizim iradəmizə təsir edə bilməz. Heç kim bizimlə ultimatum dili ilə danışa bilməz. Biz bunu İkinci Qarabağ müharibəsində Ermənistana sübut etmişik, müharibədən keçən iki il yarım ərzində Ermənistanın himayədarlarına sübut etmişik. Onları məğlub etmişik və bir daha bütün dünyaya göstərmişik ki, biz istədiyimizə nail oluruq və olacağıq» xəbərdarlıqlarından belə nəticə çıxarmayan Ermənistanın baş naziri Nikol Paşinyan və dəstəkçiləri  separatçı rejimi, terrorçu dəstələri müxtəlif yollarla   silahlandırırlar.  Xankəndi separatçılarının  törətdikləri  təxribatlara baxmayaraq Azərbaycan Ordusunun əsgərləri düşmənin bütün həmlələrinə layiqli cavab verirlər. Son günlərdə   müxtəlif yüksəkliklərə, magistral yollara nəzarəti ələ keçirən,  müəyyən ərazilərdə irəliləyərək bir neçə kəndi   azad edən, Şərqi   Zəngəzurda üçrəngli bayrağımızı dalğalandıran  Azərbaycan hərbçilərinin uğurlu əməliyyatları separatçılar kimi  havadarlarını da  qorxuya salıb. Fransanın  və İranın Ermənistanı silahlandırmalarına baxmayaraq Azərbaycan Ordusunun qarşısında dayanmaq gücü, cəsarəti çatmayan  Ermənistanın fərari əsgərləri postlarını tərk edib  qaçırlar. Torpaqlarımızın işğaldan azad edilməsi əməliyyatlarını  davam etdirən Azərbaycanın rəşadətli ordusu  qarış-qarış irəliləyərək  ata- baba yurdlarını işğalçılardan təmizləyirlər.

Xankəndidə toplaşan separatçı ünsürlərin təzyiqlərinə baxmayaraq  Qarabağda  ermənilərlə  danışıqlar aparmaq üçün Azərbaycanın reinteqrasiya  təklifinə müsbət  yanaşanlar çoxdur.  Müraciətdə deyildiyi kimi, Azərbaycan vətəndaşlığını qəbul edən Qarabağ ermənilərinin  təhlükəsizliyi respublikamızın Konstitusiyasının şərtlərinə uyğun olaraq qorunacaq. Amma hələ də havadarlarına arxayınlaşan İrəvanın hərbi-siyasi rəhbərliyi   təhdid xarakterli  əməlləri ilə  sülh sazişinin imzalanmasını istəyən sadə erməniləri niyyətlərindən çəkindirmək üçün hər cür çirkinliklərə əl atır. Müəyyən müddətlərdə  Prezident İlham Əliyevə müraciət edərək  Azərbaycan vətəndaşlığını qəbul etmək istədiklərini bildirən, separatçıların girovuna  çevrilən Qarabağdakı  erməni ailələrinə təzyiqlər göstərilir, onlar guya   Vətənə xəyanət, casusluq  adı ilə həbs edilirlər.   

Ermənistanla Azərbaycan sərhədində   rəsmi İrəvanın xahişi ilə yerləşdirilən Avropa İttifaqının monitorinq  missiyasının bölgədə müəyyən dəyişikliklər yaradacağı, atəşkəsin pozulması faktlarına ədalətli mövqe bildirəcəyi də    inandırıcı deyil. Bu beynəlxalq təşkilata güclü təsiri olan Fransanın  Cənubi Qafqazda baş verən hadisələrə münasibəti  bəllidir. İşğalçının havadarı olduğunu  Hayastana yardımları ilə bildirən Fransanın Prezidenti Emmanuel Makronun təşəbbüsü ilə  son aylarda  müxtəlif təşkilatlarda  Azərbaycan əleyhinə keçirilən təxribat xarakterli tədbirlər bölgədə  gərginliyi daha da artırır. Bəllidir ki,   Avropa Komissiyasının guya «mülki missiyası»nın  Ermənistana gətirilməsi də təşkilatda çoxluq təşkil edən fransız deputatların məkrli  təşəbbüslərinin nəticəsidir.  Həmin «missiya»nın tərkibində erməniəsilli nümayəndələrin,  xarici ölkələrdə yaşayan varlı hayların maliyyələşdirdiyi deputatların olması  istisna deyil. Ermənilərin iştirak etdikləri missiyalarda  ölkəmizə qarşı  təxribatların, silahlı qarşıdurmaların baş verməsi təkzibolunmaz faktdır. Bu «təcrübənin» acı nəticələrini  Azərbaycan xalqı 1990-cı ilin 20 Yanvarında yaşamışdı. İmperiyanın əli qanlı qoşunlarının tərkibində  Bakıda qırğınlar  törədən ermənilər hələ o zamanlarda başqalarının əbalarının altında gizlənməyi sınaqdan keçirmişdilər. 

Əsas məsələ isə odur ki,   nə qədər silahlansalar da Hayastanın  «qüdrətli ordusunda» fərarilik hələ də davam edir.  Vətən müharibəsinin davam etdiyi  müddətdə Ermənistan ordusunda  fərarilik hallarının baş alıb getdiyini  vurğulayan  Prezident İlham Əliyevin sözlərini   müsahibələrində etiraf edən Nikol Paşinyanın xanımı Anna Paşinyan  bildirib ki,  44 günlük İkinci Qarabağ müharibəsində   Hayastan ordusundan 11 min nəfərdən artıq əsgər fərarilik edib.  Azərbaycanın qüdrətli  əsgərini görən ermənilər  ağ bayraq qaldırırdılar. Eyni vəziyyət bu gün də davam edir. Hərbi xidmət yaşı çatmış gənc ermənilər  müxtəlif yollarla  çağırışlardan yayınır, yaxud  ölkəni tərk edirlər. Rüşvət müqabilində döyüş bölgəsinə getməkdən sığortalanırlar. Vətənimizin müdafiəsi, əzəli torpaqlarımızın işğaldan azad olunması naminə  qəhrəmalıq göstərən Azərbaycan əsgərindən fərqli olaraq erməni hərbçiləri nəyin naminə vuruşduqlarını belə dərk etmirlər.  Bu reallığı görən  Ermənistanın  revanşist siyasi  dairələri rəzil  maraqları naminə  gəncləri  ölümə göndərmək niyyətlərindən əl çəkmirlər. Belə   gülünc vəziyyətdə olan  Hayastan kimi  havadarlarının da  hərbi ritorikası sabun köpüyündən başqa bir şey deyil.  Prezident İlham Əliyev dəfələrlə vurğulayıb ki,  havadarlarına arxayınlaşan rəsmi İrəvan bilməlidir ki, heç kim onların əvəzinə  döyüş əməliyyatlarında vuruşmayacaq.  Ermənilərin rahat yaşaması üçün  işğalçı dövlət  Bakının irəli sürdüyü şərtlər çərçivəsində sülh müqaviləsini imzalamalı, delimitasiya işləri aparılmalı və  Qarabağı Azərbaycan ərazisi kimi tanımalıdır. Başqa  variantlar, xüsusilə hərbi əməliyyatlar barədə düşünən, havadarlarının vədlərinə arxayınlaşan  Ermənistan onu gözləyən daha ağır nəticələrə hazır olmalı və dövlət başçımızın bu sözlərini unutmamalıdır:  «Yenə də deyirəm, Ermənistan dövləti hazırda burada ilk sıralarda deyil. Amma bu, bizi heç nədən çəkindirməyəcək. Biz artıq bunu dəfələrlə sübut etmişik və İkinci Qarabağ müharibəsi bunu göstərdi, müharibədən keçən iki il bunu göstərdi. Heç kim bizə təsir göstərə bilməz. Zənglər ola bilər, hansısa bəyanatlar ola bilər, onlara əhəmiyyət vermək lazım deyil. Sadəcə olaraq, siyasi nəzakət naminə biz bu zənglərə cavab veririk. Ancaq bu, bizim mövqeyimizi zərrə qədər dəyişməyəcək.»

Dövlət başçımızın vurğuladığı kimi, gün gələcək, biz Qərbi Azərbaycanda da belə gözəl məclis keçirəcəyik və bu günü xatırlayacağıq. O zaman paşinyanlar, makronlar, persiyanlar o torpaqlarda olmayacaqlar.

Xuraman İsmayılqızı, «İki sahil»