1992-ci il fevral ayının 25-dən 26-na keçən gecə Erməni silahlı qüvvələri tərəfindən törədilmiş etnik təmizləmə nəticəsində Xocalı şəhərinin dinc əhalisindən 613 nəfər öldürülmüş, 487 nəfər sağlamlıq imkanlarını itirmiş, 1275 nəfər dinc sakin — qocalar, uşaqlar, qadınlar əsir götürülərək ağlasığmaz erməni zülmünə, təhqir və həqarətlərinə məruz qalmışlar. 150 nəfərin taleyi hələ də məlum deyil. Xocalıda öldürülmüş 613 nəfərdən 106 nəfəri qadın, 63 nəfəri uşaq, 70 nəfəri qoca idi. 8 ailə bütövlükdə məhv edilərək, 24 uşaq hər iki valideynini, 130 uşaq isə valideynlərindən birini itirdi. O gecə insanlar diri-diri yandırılmış, başları kəsilmiş, üzlərinin dərisi soyulmuş, körpə uşaqların gözləri çıxarılmış və sadalanması mümkün olmayan dəhşətli işgəncələr verilmişdi.
31 ildir ki, dünya Xocalı soyqırımına göz yumur. Bu dəhşətli cinayəti törədənlər heç vaxt məsuliyyətə cəlb edilməyiblər. Onlar azadlıqda gəzirlər, onların vəhşiliklərinin qurbanları isə nişansız qəbirlərdə basdırılır və çoxlarının qəbirləri belə yoxdur.
Bu gün biz 31 il öncə sırf milli kimliyinə görə soyqırımına məruz qalmış Xocalı şəhərinin adından dünyaya səslənirik. O, ağlasığmaz dəhşətlər görmüş, buna baxmayaraq, layiq olduğu qiyməti və ədaləti görməyən bir şəhərdir. Xocalı soyqırımından sağ çıxanlar hələ də dünyanın çəkdikləri əzabları etiraf etmələrini və günahkarların cavab verməsini gözləyirlər.
Biz Xocalı qurbanlarını həyata qaytara bilmərik, lakin ədalət tələb etməklə onların xatirəsini ehtiramla yad edə bilərik. Biz günahkarları törətdikləri cinayətlərə görə məsuliyyətə cəlb edə və Xocalı kimi hadisələrin bir daha təkrarlanmamasını təmin edə bilərik. Bu gün hər bir azərbaycanlıdan – xüsusilə gənclərdən əsas gözləntilərimiz odur ki, “Xocalıya Ədalət” Beynəlxalq Kampaniyasına dəstək olmaq, Xocalıya ədalət tələb etmək məqsədi ilə səfərbər olsunlar. Vətən müharibəsində Müzəffər Ali Baş Komandanın ətrafında sıx birləşərək dəmir yumruqla düşməndən qisasımız alan, tarixi ədaləti bərpa edən xalqın gəncləri Xocalıya ədalət üçün də yenə də öndə getməlidir.
Sizdən xahiş edirik ki, Xocalı haqqında dünyaya danışasınız. O gecə həyatını itirən 613 günahsız insandan danışın, dağılan ailələrdən danışın, hələ də qəlbimizdə qalan ağrılardan danışın. Deyin ki, Xocalı unudulmamalıdır və unudulmayacaq! Sizdən Xocalı soyqırımı haqqında məlumatlandırmaq, qurbanlar və onların ailələri üçün ədalət tələb etmək üçün sosial şəbəkə platformalarından istifadə etmənizi xahiş edirik. Bizə təkcə özümüz üçün deyil, bütün dünyada soyqırım və ədalətsizlik qurbanları üçün ədalət lazımdır. Bizə dünyanın Xocalıda baş verənləri heç vaxt unutmamasını tələb etməsi lazımdır. Çünki yalnız o zaman biz əlimizdən alınanların xatirəsini həqiqətən də ehtiramla yad edə bilərik.
Şahin Rəhmanlı,
“İrəli” İctimai Birliyinin sədri
