Dünya çempionatında A qrupunun oyunları başa çatıb.

“İki sahil” xəbər verir ki,  bu qarşılaşmalardan sonra daha 2 komandanın 1/8 finala vəsiqə qazanması dəqiqləşib.

Bunlardan biri - Niderland millisi Qətərdə keçirilən dünya çempionatında 1/8 final mərhələsinə vəsiqə qazanıb. 

Komanda A qrupunun sonuncu - III turunda ev sahibi Qətər seçməsi ilə üz-üzə gəlib.  Qarşılaşma Avropa təmsilçisinin 2:0 hesablı qələbəsi ilə bitib. Qolları 26-cı dəqiqədə Kodi Qakpo, 49-cu dəqiqədə Frenki de Yonq vurub. "Narıncılar" 7 xalla qrup lideri kimi növbəti raunda yüksəlib. Niderland yığması pley-offda B qrupunda ikinci yeri tutan komanda ilə görüşəcək. 

Seneqal millisi də 1/8 final mərhələsinə vəsiqə qazanıb.  Afrika təmsilçisi A qrupunun sonuncu - III turunda Ekvadorla üz-üzə gəlib. 

Qarşılaşma Seneqalın 2:1 hesablı qələbəsi ilə bitib. Komandanın qollarını 44-cü dəqiqədə penaltidən İsmaila Sarr və 70-ci dəqiqədə Kalidu Kulibali vurub. Cənubi amerikalılarda isə Moises Kaysedo 67-ci dəqiqədə fərqlənib.  Seneqal kollektivi 6 xalla qrup ikincisi kimi pley-offa yüksəlib və növbəti raundda B qrupunun lideri ilə görüşəcək. 

Bununla da 1/8 finala çıxan komandaların sayı 5 olub. Bundan öncə isə Braziliya, Fransa və Portuqaliya 1/8 finaıa vəsiqə qazanmışdı.